शेतकरी धडकणार सिडको भवनावर

विरोधानंतरही काढली सुधारित अधिसूचना

| उरण | वार्ताहर |

सिडकोने विकासाच्या नावाखाली पुन्हा एकदा सुधारित अधिसूचना काढली आहे. तालुक्यातील चाणजे, नागाव, केगाव, बोकडवीरा, पागोटे व फुंडे येथील गावातील शेतकऱ्यांच्या जमिनी संपादीत होणार आहेत. विरोधानंतरही अधिसूचना काढण्यात आल्याने शेतकऱ्यांमध्ये असंतोष खदखदत आहे. याला विरोध करण्यासाठी शेतकऱ्यांची व्रजमूठ आवळली असून 4 जानेवारी रोजी सिडको भवनावर धडकण्याचा निर्णय घेण्यात आला आहे. यावेळी हरकती व निषेध नोंदविण्यात येणार आहे.

उरण तालुक्यातील चाणजे, नागाव, केगाव, बोकडवीरा, पागोटे व फुंडे येथील गावात स्वातंत्र्यपूर्वीपासूनच नागरिक राहात आहेत. तसेच, त्यांच्या मालकीची शेती आहे. सिडकोने विकासाच्या नावाखाली तालुक्यातील या गावातील शेतकऱ्यांचा जमिनी संपादित करण्यासाठी प्रयत्न सुरु केले आहेत. यासाठी सिडकोने जमिनी संपादित करण्यासाठी अधिसूचनाही प्रसिद्ध केली आहे. 12 ऑक्टोबर 2022 काढण्यात आलेल्या अधिसूचनेनंतर येथील संतप्त झालेल्या शेतकऱ्यांनी सिडकोच्या अधिसूचनेला यापूर्वीच निषेध, हरकती नोंदवून प्रखर विरोध केला. शेतकऱ्यांच्या प्रचंड विरोधानंतर सिडकोने पुन्हा एकदा सुधारित अधिसूचना काढली आहे.

दि.22 रोजी काढलेल्या अधिसूचनेनंतर परिसरातील शेतकरी संतप्त झाले आहेत. संतप्त झालेल्या शेतकऱ्यांची सोमवारी (दि.25) सिडको प्रकल्पग्रस्त घर व जमीन बचाव समितीच्या नेतृत्वाखाली तातडीने बैठक बोलविण्यात आली होती. या बैठकीला समितीचे पदाधिकारी भुषण पाटील, सुधाकर पाटील, संतोष पवार, काका पाटील, अरविंद घरत, महेश म्हात्रे, चेतन गायकवाड, मधुसूदन म्हात्रे, ॲड.दिपक ठाकूर आणि शेतकरी उपस्थित होते. सिडकोला द्रोणागिरी नोडमध्ये साडेबारा टक्के विकसित भूखंड वाटपासाठी जमीन कमी पडत आहे. त्यासाठी चाणजे, नागाव-केगाव आणि अन्य गावांतील जमिनी नव्याने संपादित करण्यासाठी अधिसूचना काढली आहे. परंतु राहती घरे असताना जमिनी संपादित केल्या जात असल्याने शेतकरी संतप्त झाले आहेत, असे समितीचे संतोष पवार यांनी सांगितले.