फिकाच्या रिपोर्टने क्रिकेटविश्‍वात खळबळ
। मुंबई । वृत्तसंस्था ।
ऑस्ट्रेलियातील टी20 विश्‍वचषकात मोठ्या संघांना पराभवाचा सामना करावा लागला त्यात प्रामुख्याने न्यूझीलंड, भारत, ऑस्ट्रेलिया आणि दक्षिण आफ्रिका यांचा समावेश आहे. विश्‍वचषकातील खराब कामगिरीमुळे भारतीय संघावर चोहीबाजूंनी टीका देखील झाली. त्यातील काही टीका या परदेशातील टी20 लीग खेळण्यासाठी बीसीसीआयने भारतीय खेळाडूंना परवानगी द्यावी अशी मागणी देखील केली. त्याचवेळी फेडरेशन ऑफ इंटरनॅशनल क्रिकेटर्स असोसिएशनच्या अहवालातून एक धक्कादायक आकडेवारी समोर आली आहे. या अहवालानुसार, बहुतेक खेळाडूंना त्यांच्या स्वतःच्या देशाव्यतिरिक्त इतर टी20 ल लीगमध्ये खेळायचे आहे. ज्यामुळे त्यांना आर्थिकरित्या सक्षम होता येईल.
टी20 लीगचे जागतिक क्रिकेटवर वर्चस्व आहे. जवळपास सर्वच कसोटी खेळणार्‍या देशांमध्ये टी20 लीगचे आयोजन केले जात आहे. जगातील अनेक खेळाडूंनी यासाठी आपल्या देशाचा केंद्रीय करार नाकारला. फिका, आंतरराष्ट्रीय क्रिकेटर्स असोसिएशन फेडरेशनने जारी केलेल्या नवीन अहवालात असा दावा करण्यात आला आहे की जगातील 49 टक्के खेळाडू आगामी काळात केंद्रीय करार नाकारू शकतात. त्याऐवजी तो फ्रीलान्स होऊन वेगवेगळ्या लीगमध्ये खेळेल.
फिकाने या सर्वेक्षणात भारतीय खेळाडूंचा समावेश केलेला नाही, कारण ते फिका च्या कक्षेत येत नाहीत. अहवालानुसार, 49 टक्के खेळाडूंना डोमेस्टिक लीगमध्ये खेळून जास्त पैसे मिळाल्यास ते सेंट्रल कॉन्ट्रॅक्ट नाकारण्याचा विचार करू शकतात. याशिवाय, एकदिवसीय क्रिकेट हळूहळू संपेल अशी आणखी एक चर्चा आहे. खेळाडूही 50 षटकांच्या एकदिवसीय सामन्यांना पूर्वीपेक्षा जास्त महत्त्व देत नाहीत.
फिकाच्या अहवालानुसार, जगातील 54 टक्के खेळाडूंना वाटते की 50 षटकांचा विश्‍वचषक हा अजूनही आयसीसीचा सर्वात मोठा कार्यक्रम आहे. तथापि, मागील अहवालाच्या तुलनेत यात घट झाली आहे. 2018-19 मध्ये, 86 टक्के खेळाडूंना वाटले की एकदिवसीय विश्‍वचषक सर्वोत्कृष्ट वाटला. आयसीसी क्रमवारीत पहिल्या नऊमधील संघांनी गेल्या वर्षी सरासरी 81.5 दिवस आंतरराष्ट्रीय क्रिकेट खेळले. क्रमवारीत 10 ते 20 मधील असलेल्या संघांनी सरासरी 21.5 दिवस क्रिकेट खेळले आहे. 2021 मध्ये 485 आंतरराष्ट्रीय सामने खेळले गेले. 2020 मध्ये कोविड-19 महामारी दरम्यान झालेल्या 290 सामन्यांपेक्षा हे 195 अधिक आहे. हा आकडा 2019 (522 सामने) पेक्षा खूपच कमी आहे.
एका क्रिकेट संकेतस्थळाने दिलेल्या वृत्तानुसार, फिका या क्रिकेटपटूंच्या संघटनेने आपला एक अहवाल सादर केला. यामध्ये जगभरातील बहुतांशी क्रिकेटपटूंचा कल हा विविध टी20 लीग खेळण्याकडे असल्याचे दिसून येत आहे. सध्या जगातील तब्बल 40 टक्के खेळाडू टी20 लीग खेळण्यासाठी आपल्या राष्ट्रीय संघासह करारात नाहीत. तर, 42 टक्के खेळाडू कमीत कमी एक लीग खेळत असतात.
