महसूल विभागाकडून आर्थिक फसवणूक

लाखोंची रॉयल्टी घेऊनही उत्खननास प्रशासनाचा नकार; उरणच्या तहसीलदारांचा अजब कारभार

। अलिबाग । प्रतिनिधी ।

उरणमधील बोरीपाखाडी येथील तांडेल यांनी माती उत्खनन करण्यासाठी रॉयल्टी भरली. शासनाच्या तिजोरीत 12 लाख रुपयांहून अधिक महसूल जमा केला. परंतु, महसूल विभागानेच तांडेल यांची आर्थिक फसवणूक केल्याचा प्रकार समोर आला आहे. लाखो रुपयांची रॉयल्टी घेऊनही उत्खनन करण्यास प्रशासनाकडून परवानगी नाकारली आहे. त्यामुळे उरणच्या तहसीलदारांसह खनिकर्म विभागाचा अजब कारभार उघडकीस आला आहे. त्यामुळे या कामात पारदर्शकतेला काळे फासण्यात आल्याचा आरोप होत आहे.

मिळालेल्या माहितीनुसार, उरण तालुक्यातील बोरीपाखाडी या गावात सर्वे नं. 3/1 मध्ये उत्खनन करण्यास नारायण भोईर यांना परवानगी देण्यात आली असून, याच जागेपासून जवळपास 500 मीटर अंतरावर उत्खनन करण्याची मागणी वामन तांडेल यांनी केली होती. मंडळ अधिकारी यांच्या अभिप्रायानुसार, तांडेल यांना खोदाई करण्यासाठी मान्यता मिळाली. त्याअगोदर रॉयल्टीच्या नावाखाली प्रशासनाने लाखो रुपयांचा महसूल जमा करून घेतला. मात्र, तांडेल ज्या जागेत खोदाई करणार होते, ती जागा सेफ्टी झोन असल्याचा साक्षात्कार महसूल विभागाला झाला. वामन तांडेल यांना खोदाई करण्यास परवानगी नाकारण्यात आली. त्यांना त्याबाबत पत्र देण्यात आले. सेफ्टी झोनचा दाखला देत परवानगी नाकारल्याने तहसीलदारांसह प्रांत अधिकार्‍यांच्या कामकाजावर प्रश्‍न उपस्थित करण्यात येत आहे.

रॉयल्टीच्या नावाने शासनाच्या तिजोरीत जमा झालेली लाखो रुपयांची रक्कम मात्र अद्यापपर्यंत प्रशासनाकडून परत करण्यात आली नाही. ही रक्कम परत देण्याबाबतही कोणतीही हालचाल तहसीलदार यांच्याकडून करण्यात आली नाही. उरणमधील महसूल विभागाच्या या भोंगळ कारभारातून व्यावसायिकांची आर्थिक लूट केल्याचा प्रकार समोर येत आहे. याकडे जिल्हाधिकारी किशन जावळे यांनी गांभीर्याने लक्ष देऊन योग्य ती कारवाई करावी, अशी मागणी नागरिकांकडून होत आहे.

शासकीय जागेतील खोदाईबाबत तहसीलदार अनभिज्ञ
नकाशानुसार भोईर ज्या जागेत खोदाई करीत आहेत, त्यातील काही जागा शासनाच्या मालकीत येते. परंतु, याबाबत तहसीलदार अनभिज्ञ असल्याचे समोर आले आहे. भोईर ज्या ठिकाणी खोदाई करतात, तेथील जागा शासकीय जागा नसल्याचा दावा त्यांच्याकडून करण्यात आला आहे. भूमीअभिलेख विभागाच्या नकाशात शासकीय जागा दिसून येते. तरीदेखील महसूल अधिकारी असा दावा करीत असल्याने त्यांच्या कामाबाबत संशय व्यक्त केला जात आहे.

तांडेल यांनी उत्खननासाठी अर्ज केला होता. मंडळ अधिकारी यांच्याकडून अहवाल मागविण्यात आला होता. त्यांच्याकडून अहवाल प्राप्त झाल्यावर पुढील कार्यवाही केली. परंतु, तांडेल ज्या जागेत खोदाई करणार होते, ती जागा सेफ्टी झोनमध्ये येत असल्याचे नंतर लक्षात आले. मंडळ अधिकारी यांच्यादेखील लक्षात आले नाही. त्यामुळे तांडेल यांना उत्खननासाठी परवानगी नाकारण्यात आली आहे.

– उद्धव कदम, तहसीलदार, उरण