अग्निशमनची माणगावामध्ये अग्निपरीक्षा

बळकटीकरणासाठी अनेक शर्यती कराव्या लागणार पार
। माणगाव । वार्ताहर ।
माणगावकरांच्या अभिमानाचा व जिव्हाळ्याचा प्रश्‍न बनलेली गेली अनेक दिवसापासून प्रतिक्षेत असणारी अग्निशमन हे वाहन येत्या काही दिवसात नागरिकांच्या सेवेला येत आहे. हे वाहन नुसते आग विझविण्यापुरते मर्यादित नाही. तर ते अत्याधुनिक यंत्रसामुग्रीसह विविध घटना घडल्यास अशा नैसर्गिक आपत्तीशी सामना करण्यासाठी दोन हात पुढे करण्यासाठी सरसावणार आहे. त्यामुळे ही अत्याधुनिक सुसज्य अग्निशमन नुसती माणगावकरांची शान नव्हे तर रायगडातील प्रत्येक नागरिकांच्या अभिमानाची बाब आहे. रायगडातील संभाव्य कोणत्याही नैसर्गिक आपत्तीशी मुकाबला करण्यासाठी ती सदैव सज्ज राहणार आहे.

रायगड जिल्ह्यात पहिलेच सर्व सोयीनियुक्तअत्याधुनिक सुसज्य अग्निशमन वाहन माणगाव नगरपंचायतीला मंजूर असून हे वाहन बनवण्याचे काम सध्या संबधित ठेकेदारामार्फत सुरु असून सुमारे 3 कोटी 17 लाख 81 हजार रुपये शासनाला खर्च येणार आहे. मात्र त्यासाठी उभारावे लागणारे अग्निशमन केंद्रासाठी जागा, अधिकारी, वाहन चालक, कर्मचारी, कुशल तंत्रज्ञ, मनुष्यबळ ही बळकटीकरणासाठी आवश्यक आहे. शासनाच्या नियमात नगरपंचायतीच्या लोकसंख्येनुसार नियम लागणार असून अग्निशमन सेवा बळकटी करणासाठी नियमांची शर्यत पार करावी लागणार असून अग्निशमनला माणगावात अग्निपरीक्षा द्यावी लागणार आहे.

माणगाव नगरपंचायतीला सन 2020-21 या आर्थिक वर्षाकरिता जिल्हा नियोजनातून माणगाव नगरपंचायतीच्या माजी नगराध्यक्षा योगिता चव्हाण यांच्या कार्यकाळात खा. सुनीत तटकरे व पालकमंत्री अदिती तटकरे यांच्याकडे माणगाव नगरपंचायतीने माणगावकरिता अग्निशमन वाहन मिळण्यासाठी मागणी केली होती. त्यावेळी त्यांच्या पाठपुराव्यामुळे शासनाच्या जिल्हा नियोजन मधून शीघ्र प्रतिसाद क्यूआरव्ही वाहन तथा अग्निशमन वाहन बीएस-6 आवश्यक यंत्रसामुग्री सहित खरेदी करण्यासाठी 3 कोटी 17 लाख 81 हजार रुपये मंजूर करण्यात आले होते. तब्बल 10 महिने लोटले अजूनही हे वाहन माणगाव नगरपंचायतीत आलेले नाही.

माणगाव हे मुंबई-गोवा महामार्गावरील तालुक्याचे ठिकाण असून या गावाचे महत्व दिवसेंदिवस वाढत आहे. वेगवेगळ्या वस्तूंमुळे व गोष्टींमुळे माणगावला अनन्य साधारण महत्व प्राप्त झाले असून अत्याधुनिक सुसज्य अग्निशमन वाहनामुळे वैभवात निश्‍चितच भर पडणार आहे. त्याचबरोबर माणगाव ही नगरपंचायत असून नगरपंचायतीच्या लोकसंख्येनुसार अग्निशमन सेवा बळकटीकरणाच्या योजनेनुसार अग्निशमन अधिकारी, स्टेशन सुपरवायझर, लिडिंग फायरमॅन, ड्रायव्हर कम ऑपरेटर, फायरमन प्लस मदतनीस अशी विविध पदे शासनाच्या नियमानुसार भरावी लागणार आहेत. त्यामुळे माणगाव नगरपंचायतीला अग्निशमन सेवा बळकटीकरणाच्या योजने अंतर्गत नियमांची शर्यत पार करावी लागणार आहे.