कम्युनिस्ट पक्षाच्या आंदोलनची वर्षपूर्ती

विविध मागण्यांसाठी अखंडितपणे पाठपुरावा सुरु

| उरण | प्रतिनिधी |

नवी मुंबईतील बेलापूर येथील सिडको भवनच्या गेटसमोर प्रकल्पग्रस्तांच्या मागण्यांसाठी भारताचा कम्युनिस्ट पक्षातर्फे बेमुदत धरणे आंदोलन सुरू आहे. त्याला आता 1 वर्ष पूर्ण होणार आहे. त्यानिमित्त सिडको भवनासमोर आंदोलनाचा वर्षपूर्ती कार्यक्रम मंगळवारी (दि.28) दूपारी 2.00 वाजता आयोजित केला आहे. या वर्षपूर्ती कार्यक्रमाला सर्व प्रकल्पग्रस्त, शेतकरी व भूमीपुत्रांनी मोठ्या संख्येने उपस्थित राहावे, असे आवाहन भारताचा कम्युनिस्ट पक्ष (मार्क्सवादी) यांच्यातर्फे करण्यात आले आहे.

सिडकोने रायगड व नवी मुंबई मधील जमिनी घेऊन ‌‘तुमचा विकास करतो‌’, अशी आशा दाखवून स्वतःचाच विकास केला. मात्र, येथील शेतकरी प्रकल्पग्रस्त गावाभोवती होणाऱ्या विकासाला स्वतःचा विकास समजू लागला. प्रस्थापित राजकीय पक्षांचे पुढारी सिडकोचे ठेकेदार व दलाल बनून शेतकऱ्यांच्या बाजूने उभे न राहता सिडकोच्या बाजूने उभे राहिले आहेत. त्यामुळे सिडकोची ताकद वाढली. शेतकऱ्यांच्या जमिनी घेऊन स्वतःचाच विकास केला. शेतकऱ्यांच्या लढ्यातून मिळालेले 12.5 टक्क्याचे प्लॉट देण्यास सिडको गेली कित्येक वर्षे टाळाटाळ करीत आहे. न्यायालयाच्या आदेशानंतर सुद्धा वाढीव परतावा देण्यास सिडको टाळाटाळ करीत आहे. वाढीव गावठाणे अतिक्रमित, अनधिकृत ठरवून पाडण्याच्या नोटीसा कोर्टाकडून आणत आहे. या सर्व प्रश्नांच्या विरोधात भारताचा कम्युनिस्ट पक्षातर्फे दि.28 एप्रिल 2025 पासून नवी मुंबई मधील बेलापूर येथील सिडको भवनच्या गेटसमोर बेमुदत धरणे आंदोलन सुरु आहे. त्या आंदोलनातील मागण्या या सर्व शेतकरी, प्रकल्पग्रस्त जनतेच्या आहेत, प्रत्येक गावाच्या प्रत्येक घरातल्या आहेत. तेव्हा हे आंदोलन पुढे नेण्यासाठी व यशस्वी करण्यासाठी हया लढयात आपण सर्वांनी सहभागी व्हावे, असे आवाहन करण्यात आले आहे. एक वर्ष पूर्ण होऊनही शेतकरी प्रकल्पग्रस्तांच्या मागण्या अजूनही पूर्ण न झाल्याने शेतकरी व प्रकल्पग्रस्तांमध्ये तीव्र असंतोष पसरला आहे.