धोनीने दिले निवृत्तीचे संकेत?

| मुंबई | प्रतिनिधी |

भारतीय संघाची माजी आणि यशस्वी कर्णधार महेंद्रसिंह धोनी हा नेहमीच आश्‍चर्यकारक निर्णयानं चाहत्यांना थक्क करताना पाहायला मिळाले आहे. क्रिकेटच्या मैदानात कॅप्टन्सी करताना खेळलेला त्याचा डाव असो वा आंतरारष्ट्रीय क्रिकेटमधून निवृत्तीचा निर्णय त्याने चाहत्यांना वेळोवेळी आश्‍चर्याचा धक्का दिला आहे. कॅप्टन्सी सोडल्यावर 2019 मध्ये वनडे वर्ल्ड कप स्पर्धेत टीम इंडियाच्या ताफ्यातून खेळताना न्यूझीलंड विरुद्ध रन आउट झाल्यावर धोनी आंतरराष्ट्रीय क्रिकेटमध्ये दिसणार नाही, याची कल्पनाही कुणी केली नव्हती. पण भाऊनं 2020 मध्ये सर्वजण स्वातंत्र्य दिनाचा उत्सव साजरा करण्यात व्यस्त असताना सोशल मीडियावरील एका पोस्टच्या माध्यमातून आंतरराष्ट्रीय क्रिकेटमधून थांबतोय असं जगजाहिर केले. कितीही मोठा क्रिकेटर असला तरी त्याला थांबावे लागतेच, ही गोष्ट खरीये, पण धोनीनं मैदानातून निरोप घ्यावा, अशी त्याच्या प्रत्येकाची इच्छा होती, त्यामुळेच अनेकांना त्याचा निर्णय आश्‍चर्यचकित वाटला. आंतरारष्ट्रीय क्रिकेटमधून निवृत्ती घेतली असली तरी तो आयपीएलच्या माध्यमातून क्रिकेटशी आणि आपल्या चाहत्यांशी कनेक्ट आहे. 2025 च्या हंगामात अनकॅप्ड खेळाडूच्या रुपात तो मैदानात उतरणार आहे. गेल्या काही हंगामापासून तो आयपीएलच्या मैदानात उतरला की, हा हंगाम त्याचा शेवटचा असेल का? हा प्रश्‍न चर्चेत असायचा. धोनीनं डेफिनेटली नॉट म्हणत आपल्या निवृत्तीची चर्चा फोल ठरवली. पण आता त्याने खुद्द यंदाचा हंगाम शेवटचा असल्याचे संकेत दिले आहेत.