Palhe Bridge: पाल्हे पुलावरील लोखंडी बॅरिअर्स तोडून अवजड ट्रकची घुसखोरी

जिल्हाधिकाऱ्यांच्या आदेशालाच केराची टोपली
चालकावर गुन्हा दाखल करण्याची नागरिकांची मागणी

| रायगड | जिल्हा प्रतिनिधी |

अलिबाग तालुक्यातील धोकादायक घोषित करण्यात आलेल्या पाल्हे पुलावरील वाहतूकबंदीला अवजड वाहन चालकांकडून सर्रास हरताळ फासला जात असल्याचे पुन्हा समोर आले आहे. जड वाहनांना स्पष्ट बंदी असतानाही मंगळवारी जेएसडब्ल्यू कंपनीच्या रेडीमिक्सर ट्रकने पुलासमोरील लोखंडी बॅरिअर्सला जोरदार धडक देऊन ते तोडत पुढे जाण्याचा प्रकार घडला. या घटनेमुळे सार्वजनिक बांधकाम विभागाच्या सुरक्षाव्यवस्थेलाच तडा गेला असून, संबंधित चालकाविरोधात गुन्हा दाखल करण्याची जोरदार मागणी नागरिकांकडून होत आहे.

स्ट्रक्चरल ऑडिटनंतर अलिबाग-आक्षी मार्गावरील बेली पूल आणि सहाण बायपासवरील पाल्हे पूल धोकादायक असल्याचे स्पष्ट झाले होते. त्यानंतर जिल्हाधिकारी किशन जावळे यांनी वर्षभरापूर्वीच या दोन्ही पुलांवरून जड आणि अवजड वाहनांच्या वाहतुकीस बंदी घालणारे आदेश जारी केले होते. या आदेशाची अंमलबजावणी करण्यासाठी सार्वजनिक बांधकाम विभागाने पुलांच्या प्रवेशद्वारावर लोखंडी बॅरिअर्स उभारले असून, इशारा फलकही लावले आहेत. तरीही मंगळवारी दुपारी एमएच 46 सीयू 2873 क्रमांकाच्या जेएसडब्ल्यू कंपनीच्या रेडीमिक्सर ट्रकने बॅरिअर्सला धडक देत ते तोडल्याची घटना घडली.

बेली पुलावर पाच टनांपर्यंत, तर पाल्हे पुलावर 16 टनांपर्यंतच्या वाहनांनाच परवानगी आहे. मात्र, या मर्यादेचे उल्लंघन करून अवजड वाहने पुलावरून जात असल्याने पुलांची सुरक्षितता आणखी धोक्यात येत असल्याची भीती व्यक्त केली जात आहे.

जिल्हाधिकाऱ्यांचे आदेश, सार्वजनिक बांधकाम विभागाचे बॅरिअर्स आणि इशारा फलक यांना न जुमानता सुरू असलेल्या या मनमानीमुळे प्रशासनाच्या कारवाईवरही प्रश्नचिन्ह निर्माण झाले आहे. नियम मोडणाऱ्या वाहनचालकांवर तातडीने गुन्हे दाखल करून कठोर कारवाई करावी, अन्यथा एखादी गंभीर दुर्घटना घडल्याशिवाय प्रशासन जागे होणार नाही, असा संतप्त सवाल नागरिक उपस्थित करत आहेत.