| पालघर | प्रतिनिधी |
जुहू येथून सुरतच्या दिशेने निघालेले एक हेलिकॉप्टर उड्डाणादरम्यान तांत्रिक बिघाड झाल्याने केळवे रोड परिसरात आपत्कालीन रित्या उतरवावे लागले. या हेलिकॉप्टरमध्ये झालेला तांत्रिक बिघाड (एरर) दूर झाल्यानंतर या हेलिकॉप्टरने 45 मिनिटांनंतर पुन्हा भरारी घेतली. या घटनेत हेलिकॉप्टरमधील कोणालाही दुखापत झाली नाही.
दुपारी साडेबारा वाजताच्या सुमारास एक हेलिकॉप्टर केळवे रोड परिसरात घिरट्या मारत होते. आपत्कालीन लँडिंगनंतर तांत्रिक पथकाशी संपर्क साधून त्यांच्या मार्गदर्शनाखाली आवश्यक दुरुस्ती करण्यात आली. दुरुस्ती प्रक्रियेस सुमारे 45 मिनिटांनी सव्वा वाजल्याच्या सुमारास या हेलिकॉप्टरने नियोजित सुरतकडील प्रवास रद्द करून सुरक्षिततेच्या दृष्टीने हेलिकॉप्टर नंतर जुहू येथील मुख्य कार्यालयाच्या दिशेने रवाना झाले.
हेलिकॉप्टरचा आवाज आल्यानंतर केळवे रोड पोलीस चौकी वरील कर्मचारी तातडीने शाळेजवळ पोहोचले. बघणाऱ्यांची गर्दी झाल्याने पोलिसांनी आवश्यक उपाय योजना आखल्या व सफाळे येथून अतिरिक्त बंदोबस मागवून घेण्यात आला होता. या संदर्भात सफाळा पोलीस ठाण्याचे सहाय्यक पोलीस निरीक्षक दत्ता शेळके यांनी सांगितले की, तांत्रिक बिघाड झाल्याने हेलिकॉप्टर आपत्कालीन रित्या खाली उतरवण्यात आले. या हेलिकॉप्टरमधील चारही व्यक्ती हेलिकॉप्टरच्या जवळ उभी होती व इतरत्र कुठेही गेली नसल्याची माहिती पुढे आली आहे. दुरुस्ती करून ते सुरक्षितपणे जुहूकडे रवाना झाले असून कोणतीही जीवितहानी झालेली नाही, असे सांगितले. या घटनेबद्दल पालघर जिल्हाधिकारी कार्यालयाकडे कोणतीही माहिती संबंधित विमान कंपनीने दिली नसल्याचे सांगण्यात आले.