टेम्पोची धडक;रिक्षा चालकाच्या पुतण्याचा मृत्यू

। माणगाव । सलीम शेख ।
मुंबई-गोवा महामार्गावर माणगावपासून 16 किमी अंतरावर असणार्‍या घोटवळ गावच्या हद्दीत पंजाबी ढाब्याजवळ मंगळवारी (दि.18) सकाळी साडेपाच वाजता झालेल्या अपघातात एकाचा मृत्यू झाला तर दोघे जखमी झाले. घोटवळ गावाच्या हद्दीत भरधाव वेगात विरुद्ध दिशेने आलेल्या आयशर टेम्पोची रिक्षाला धडक लागल्याने हा अपघात झाला. या अपघाताची तक्रार रिक्षाचालक पंढरी हरी पहेलकर (वय-47, रा. कारगिल नगर विरार जि. पालघर मूळ रा. पहेल ता. माणगाव) यांनी माणगाव पोलीस ठाण्यात दिली.

मिळालेल्या माहितीनूसार, रिक्षाचालक पंढरी पहेलकर हे त्यांच्या ताब्यातील ऑटो रिक्षा क्र. एमएच 48 बीएफ 5863 हि विरार ते पहेल अशी मुंबई-गोवा महामार्गावरुन घेऊन जात होते. यावेळी घोटवळ गावाच्या हद्दीत आले असता मुंबई बाजूकडे जाणार्‍या एक तांबड्या रंगाच्या आयशर टेम्पोने (नंबर माहिती नाही) रस्त्याच्या परिस्थितीकडे दुर्लक्ष करीत विरुद्ध दिशेला वेगात येऊन ऑटो रिक्षाला समोरून धडक दिली.

या अपघातात रिक्षाचालक यांचा पुतण्या स्वप्नील अनंत पहेलकर (वय 33, रा. नालासोपारा पूर्व जि. ठाणे मूळ रा. पहेल ता. माणगाव) याचा मृत्यू झाला. तर रिक्षाचालक पंढरी हरी पहेलकर व त्यांच्या पत्नी सुनीता पंढरी पहेलकर जखमी झाले. याप्रकरणी माणगाव पोलीस ठाण्यात अपघाताची नोंद करण्यात आली असून पोलीस हवालदार रावसाहेब कोळेकर अधिक तपास करीत आहेत.