मूर्तीकारांना नवरात्रोत्सवाचे वेध

मूर्तीशाळांमध्ये देवीच्या मूर्ती बनविण्याची लगबग

| पनवेल | प्रतिनिधी |

पितृपक्ष सुरू झाला की वेध लागतात ते नवरात्रोत्सवाचे. घटस्थापनेला आता अवघे काही दिवस शिल्लक राहिले असून, मूर्तीशाळेत मूर्तिकारांची लगबग होताना दिसू लागली आहे. 22 सप्टेंबर रोजी घरोघरी घटस्थापना होणार असून, नऊ दिवस दुर्गा, कालिका अशा रुपात देवी विराजमान होणार आहेत. यासाठी नवी मुंबईतील मूर्तीशाळेतही मूर्तिकारांची लगबग सुरू झाल्याचे पाहायला मिळत आहे. परंतु, मागील वर्षीच्या तुलनेन यंदा देवीच्या मूर्तीच्या किमतीत 20 ते 25 टक्क्यांनी दरवाढ झाल्याचे मूर्तिकारांकडून सांगण्यात येत आहे.

येत्या काही दिवसातच नवरात्रोत्सवाला सुरुवात होणार आहे. शहरातील अनेक भागात मूर्ती बनवण्याचे काम सुरू असून, देवीच्या मूर्ती लवकरात लवकर पूर्ण करण्यासाठी आता हे कारागीर अधिक मेहनत घेत आहेत. त्यात पनवेल परिसरातील मूर्ती शाळेतील मूर्तिकार मूर्तीचे दुसऱ्या टप्प्यातील कामात मूर्तीची रंगरंगोटी करण्यात व्यस्त दिसत आहेत. गणेशोत्सवानंतर फार कमी अवधीत देवीच्या मूर्ती घडवायची असते. देवी हे स्त्री रूप असल्याने डोळे, चेहरा, हास्य आदी कामे मूर्तिकारांना बारकाईने करावी लागतात. त्यानुसार सध्या देवीच्या मूर्तीना कृत्रिम पापण्या लावण्याचे तसेच हिऱ्याची सजावट हे कारागीर करत आहेत.

मूर्तींचे काम अंतिम टप्प्यात
घरगुती देवी मूर्ती तयार झाल्या असून, सध्या मोठ्या मूर्तीचे काम अंतिम टप्प्यात आहे. घटस्थापनेसह देवी मूर्तीची स्थापना करण्याची परंपरा असल्याने मूर्तिकारांकडून देवीच्या मूर्ती साकारण्याच्या काम गतीने केले जात आहे. साधारण 8 इंचापासून 12 फुटांपर्यंत देवी मूर्ती साकारण्यांत येत आहेत. सप्तशृंगी, दुर्गा, रेणुका, महालक्ष्मी, कालिकादेवी, महिषासुरिनी, माँ वैष्णवदेवी, भवानी, एकवीरा माता अशा विविध मूर्ती तयार करण्यात येत आहेत. दुर्गा देवीची सर्वाधिक मागणी असून, त्यापाठोपाठ सप्तशृंगी देवी मूर्तीस जास्त मागणी असल्याचे विक्रेत्यांकडून सांगण्यात आले आहे.

किमतींमध्ये 20 ते 25 टक्क्यांची वाढ
यंदा मूर्तीच्या किमतीत 20 ते 25 टक्क्यांनी वाढ मूर्ती तयार करण्यासाठी लागणारे प्लास्टर ऑफ पॅरिस, रंग, नारळाच्या काथ्या, मजुरी आदींमध्ये वाढ झाल्याने यंदा मूर्तीचे भावही 20 ते 25 टक्क्यांनी वाढले आहेत. नवरात्रोत्सव मंडळाकडून बुकिंग सुरू झाली आहे. भाविकांच्या मागणीनुसार आदिशक्तीच्या मूर्ती घडवाव्या लागतात. उत्पादन खर्च वाढल्याने यंदा देवीच्या मूर्तीच्या किमतींमध्ये वाढ झाली असून, 500 रुपयांपासून ते 40 हजार रुपयांपर्यंत देवीच्या मूर्तींच्या किमती असल्याचे मूर्तिकारांचे म्हणणे आहे.