कोलाड परिसरात बेकायदेशीर भंगार दुकाने

नियम धाब्यावर बसवून ई-कचऱ्याची साठवणूक; नागरिकांमधून तीव्र संताप व्यक्त

| कोलाड | प्रतिनिधी |

कोलाड परिसरामध्ये विनापरवाना चालणाऱ्या भंगार दुकानांचा (स्क्रॅप यार्ड्स) सुळसुळाट वाढला असून, कोणत्याही वैध कागदपत्रांशिवाय हे व्यवसाय उघडपणे सुरू असल्यामुळे नागरिकांमधून तीव्र संताप व्यक्त केला जात आहे. या दुकानांवर प्रशासन व स्थानिक यंत्रणांनी तातडीने तपासणी करून कडक कायदेशीर पावले उचलावीत अशी मागणी जनतेमधून जोर धरू लागली आहे.

स्थानिक नियमांनुसार कोणत्याही भंगार दुकानासाठी शॉप परवाना, स्थानिक स्वराज्य संस्थेचे ट्रेड लायसन्स, अग्निशामक दलाचे ना-हरकत प्रमाणपत्र आणि महाराष्ट्र प्रदूषण नियंत्रण मंडळाचे प्रमाणपत्र असणे बंधनकारक असते. कोलाड भागातील अनेक दुकानांमध्ये या नियमांना पूर्णपणे हरताळ फासला जात असल्याचे चित्र आहे. विशेषतः या भंगार दुकानांमध्ये ई-कचरा, जुन्या वाहनांचे संशयित सुटे भाग आणि रासायनिक बॅटऱ्यांची विनापरवाना साठवणूक केली जात असल्याने परिसरातील पर्यावरण व सार्वजनिक सुरक्षिततेला मोठा धोका निर्माण झाला आहे.

मुंबई-गोवा राष्ट्रीय महामार्गावरील कोलाड परिसरातील असंख्य ठिकाणी भंगार व्यावसाय अतिशय बेकायदेशीर सुरु असून येथील भंगारमधील विषारी रसायने आणि तेल वाहून जवळच्या नदीत, विहिरीत किंवा भुगर्भातील पाण्यात मिसळतात यामुळे पाणी दूषित होते यामुळे नागरिकांच्या जिवाला धोका निर्माण होत आहे. याशिवाय भंगार दुकानात ज्वलनशिल पदार्थ असल्यामुळे आजूबाजूच्या परिसरात आग लागण्याची दाट शक्यता असते.अशा या भंगार व्यावसायिकांना वरदहस्त कोणाचे आहे? असा संतप्त सवाल स्थानिक नागरिकांकडून केला जात आहे.

दरम्यान, या बेकायदेशीर व्यवसायांना वाचवण्यासाठी आता बनावट ओळखीचा वापर केला जात असल्याचा धक्कादायक प्रकार समोर आला आहे. कोलाडमधील एक भंगारवाला तर बोलत असतो की, हम भी पत्रकार है! असा थेट आव आणून त्याने स्वतःची पाठराखण करण्याचा प्रयत्न केला. मात्र, चौकशीअंती संबंधित भंगारवाला हा चक्क बोगस पत्रकार असल्याचे निष्पन्न झाले आहे. भंगाराचा अनधिकृत धंदा चालवण्यासाठी आणि कायद्याच्या कारवाईतून पळवाट काढण्यासाठी बनावट पत्रकारितेचे ओळखपत्र म्हणून वापरले जात असल्याने नागरिकांमध्ये प्रचंड आश्चर्य व संताप व्यक्त होत आहे. या भंगार पत्रकाराची पण आता चौकशी केली जाणार आहे.

नियम मोडणाऱ्यांवर कारवाईची मागणी
चोरीच्या संशयास्पद मालाची खरेदी-विक्री आणि पर्यावरणास घातक कचऱ्याची साठवणूक रोखण्यासाठी भारतीय न्याय संहिता, महाराष्ट्र पोलीस अधिनियम आणि पर्यावरण संरक्षण कायद्यातील तरतुदींनुसार या दुकानांची तपासणी होणे गरजेचे बनले आहे. कोलाड परिसरातील अशा सर्व बोगस आडोशांमागे लपलेल्या अनधिकृत भंगार दुकानांचा शोध घेऊन त्यांना सील करावे आणि बोगस पत्रकारितेचा मुखवटा घालून नियम मोडणाऱ्यांवर कठोर कारवाईची मागणी स्थानिक नागरिकांकडून केली जात आहे.