तुरुंगातील अधिकारी, शिपायाला अटक

10 हजारांची लाच घेतल्याचा आरोप

। उरण । वार्ताहर ।

लाचलुचपत प्रतिबंधक विभागाने (एसीबी) नवी मुंबईतील तळोजा मध्यवर्ती कारागृहातील वरिष्ठ तुरुंग अधिकारी निवृत्ती कन्नेवाड व पोलीस शिपाई राहुल गरड यांनी कैद्याच्या भावाकडून 10 हजार रुपयांची लाच घेतल्याच्या आरोपाखाली यांना अटक करण्यात आली आहे. यापूर्वीही अधिकार्‍याने गुगल पेद्वारे रक्कम घेतल्याचा आरोप तक्रारीत करण्यात आला आहे.

मिळालेल्या माहितीनुसार, तळोजा कारागृहातील कैद्याच्या भावाला तुरुंग अधिकारी कन्नेवाड यांनी 11 डिसेंबर रोजी दूरध्वनी करून पैसे मागितले होते. परंतु, पैसे न दिल्यामुळे त्याला खूप त्रास देण्यात आला. त्यानंतर 12 डिसेंबर रोजी एका मोबाईल क्रमांकावरून कैद्याच्या भावाला पैशांबाबत व्हॉट्सअप संदेश व फोन आला होता. त्यामुळे त्या मोबाईल क्रमांकावर कैद्याच्या भावाने 1 हजार रुपये गुगल पेद्वारे पाठवले होते. त्यानंतर पुन्हा पैशांची मागणी करण्यात आली. त्यामुळे याबाबत कैद्याच्या भावाने 13 डिसेंबरला लाचलुचपत प्रतिबंधक विभागात तक्रार दाखल केली. दरम्यान, लाचलुचपत प्रतिबंधक विभागाने याबाबत पडताळणी केली असता आरोपी पोलीस शिपाई राहुल गरड यांनी 10 हजार रुपयांची मागणी केल्याचे निष्पन्न झाले. त्यानंतर शनिवारी लाचलुचपत प्रतिबंधक विभागाने रचलेल्या सापळ्यात राहुल गरड याने 10 हजार रुपयांची लाच स्वीकारली आणि ती कन्नेवाड यांना देत असताना त्यांना रंगेहात पकडण्यात आले.