खैरखुर्द उपसरपंचपदी शेकापचे जुबेर धनसे
| रोहा | प्रतिनिधी |
खैरखुर्द ग्रामपंचायतीच्या उपसरपंच पदावर शेकापचे जुबेर अकबर अली धनसे यांचा एकमेव अर्ज आल्याने त्यांची बिनविरोध निवड झाली आहे. उपसरपंच पदाची निवडणूक सरपंच मुजमिल गिते यांच्या अध्यक्षतेखाली संपन्न झाली. नामनिर्देशन पत्र दाखल करण्याच्या अंतिम वेळेपर्यंत शेकापचे जुबेर धनसे यांचा एकमेव अर्ज दाखल झाला होता. ग्रामपंचायत कार्यालयात पार पडलेल्या पहिल्या बैठकीत पीठासीन अधिकारी गिते यांनी एकमेव अर्ज दाखल झाल्याने जुबेर धनसे यांची बिनविरोध निवड झाल्याचे जाहीर केले.
याप्रसंगी ग्रामपंचायत सदस्य नरेश देवळे, शैला वाघमारे, रेश्मा गायकवाड, रिना कोंडे, भगवान यादव, नर्गिस बडे तसेच ग्रामसेवक आप्पासाहेब कांबळे उपस्थित होते. शेकाप कोकबन पं.स. चिटणीस लियाकत खोत यांनी या निवडीत मोलाची भूमिका बजावली. नवनिर्वाचित उपसरपंच यांनी त्यांच्या कार्यकर्त्यांसह शेकाप नेते पंडित पाटील व जिल्हा चिटणीस आस्वाद पाटील यांची भेट घेतली. त्यांनी त्यांचे पुष्पगुच्छ देऊन स्वागत केले.
