| संगारेड्डी | वृत्तसंस्था |
तेलंगणातील संगारेड्डी जिल्ह्यातील पासामैलाराम येथील एका रासायनिक कारखान्यात सोमवारी (दि.30) सकाळी भीषण स्फोट झाला. स्फोट इतका मोठा होता की परिसरातील लोक घाबरले. संपूर्ण परिसरात धुराचे लोट दिसत होते. आगीच्या ज्वाळांनी कारखान्याला पूर्णपणे वेढले. या स्फोटामुळे 10 कामगारांचा जागीच मृत्यू झाला असून, अनेक जण गंभीररित्या जखमी झाले आहेत.
मिळालेल्या माहितीनुसार, स्फोट इतका प्रचंड होता की काही कामगार सुमारे 100 मीटरपर्यंत फेकले गेले. त्याचवेळी अनेक मजूर तात्पुरत्या तंबूंमध्ये अडकले होते, जिथे आग लागल्यानंतर ते बाहेर पडू शकले नाहीत. आगीत बहुतेक कामगार गंभीर भाजले. आगीवर नियंत्रण मिळवण्यासाठी अग्निशमन दलाच्या 11 गाड्या घटनास्थळी दाखल झाल्या असून, शर्थीचे प्रयत्न सुरू आहेत. स्फोटाचा आवाज अनेक किलोमीटर अंतरावर ऐकू आला. त्यामुळे आसपासच्या रहिवासी भागात प्रचंड घबराट निर्माण झाली. अनेक नागरिक घाईघाईने घराबाहेर पडले. पोलिस आणि आपत्ती व्यवस्थापनाचे पथक घटनास्थळी तातडीने पोहोचले. जखमींना नजीकच्या रुग्णालयात दाखल करण्यात आले आहे. काहींची प्रकृती अत्यवस्थ असल्याचे डॉक्टरांनी सांगितले.
राज्य सरकारने या घटनेच्या चौकशीचे आदेश दिले असून कारखान्याचे सुरक्षा उपाय आणि नियमांची तपासणी केली जात आहे. अग्निशमन दलाने आग नियंत्रणात आणण्यास सुरुवात केली असून, ढिगाऱ्याखाली अडकलेल्या कामगारांना वाचवण्यासाठी शोध मोहीम सुरू आहे. प्रशासनाने मृतांच्या कुटुंबीयांना आर्थिक व वैद्यकीय मदत देण्याचे आश्वासन दिले आहे.