। मुंबई । प्रतिनिधी ।
मुंबई आंतरराष्ट्रीय विमानतळावर मर्सिडीज चालकाने पाच जणांना धडक दिल्याची घटना घडली आहे. जखमींमध्ये दोन परदेशी नागरिक आणि तीन विमानतळ क्रू मेंबर्सचा समावेश आहे. कार चालकाने चुकून एक्सीलेटर दाबल्याने ही घटना घडली असल्याची माहिती समोर येत आहे. या अपघातातील जखमींना रुग्णालयात उपचारासाठी नेण्यात आले आहे. दरम्यान, मर्सिडीज चालक नवी मुंबईतून प्रवाशांना विमानतळावर सोडण्यासाठी आला होता. विमानतळावरील गेट क्र. 1 जवळ स्पीड ब्रेकरवर चालकाने ब्रेकऐवजी एक्सीलेटर दाबला. यामुळे कार अनियंत्रित झाली आणि पाच जणांना धडक बसली. जखमी परदेशी नागरिकांना उपचारासाठी नानावटी रुग्णालयात दाखल करण्यात आहे. तर, जखमी क्रू मेंबर्सना कूपर रुग्णालयात दाखल केले आहे. याप्रकरणी सहार पोलिसांत गुन्हा दाखल करण्यात आला आहे. पोलिसांनी कार आणि चालक दोघांनाही ताब्यात घेतले आहे. पोलीस चालकाची चौकशी करत आहेत.