15 ते 20 कार्यकर्त्यांविरोधात गुन्हा
| पनवेल | विशेष प्रतिनिधी |
छत्रपती शिवाजी महाराजांच्या रायगडमध्ये डान्स बार कसे चालतात, असे वक्तव्य मनसे अध्यक्ष राज ठाकरे यांनी शेतकरी कामगार पक्षाच्या वर्धापनदिनी शनिवारी (दि.2) आयोजित मेळाव्यात केले होते. राज यांच्या वक्तव्याचे पडसाद उमटू लागले असून, आक्रमक झालेल्या मनसे कार्यकर्त्यांनी शनिवारी रात्री डान्स बारवर धडक देत बार तोडल्याचे पाहायला मिळत आहे.
शेतकरी कामगार पक्षाच्या 78 व्या वर्धापन दिन सोहळ्यात पनवेलमध्ये मनसेचे अध्यक्ष राज ठाकरे 2 ऑगस्ट रोजी आले होते. त्यांनी छत्रपती शिवाजी महाराजांची राजधानी असणाऱ्या रायगड जिल्ह्यात असलेल्या अनधिकृत डान्सबारवर टीका केली होती. या ठिकाणी बार बंद असावेत, अशी अपेक्षा करण्यात आली. त्यानंतर मनसेच्या पदाधिकाऱ्यांनी पनवेल तालुक्यातील कोनजवळ असलेल्या नाईट रायडर्स या लेडीज सर्विस बारवर धडक दिली आणि मध्यरात्री बारा वाजता संतापलेल्या मनसैनिकांनी हा बार फोडण्याचा प्रयत्न केला. याप्रकरणी पनवेल तालुका पोलीस ठाण्यात तीन ऑगस्ट रोजी पंधरा ते वीस मनसेच्या कार्यकर्त्यांविरोधात गुन्हा दाखल करण्यात आला.
पनवेलमधील मुंबई, पुणे द्रुतगती मार्गाच्या काही अंतरावर असलेल्या हा बार रात्री उशिरापर्यंत सुरू असल्याचे या कारवाईमुळे उघड झाले आहे. हातामध्ये काठ्या आणि दांडके घेऊन मनसेच्या कार्यकर्त्यांनी हा बार फोडला. राज ठाकरे यांच्या डान्स बारविरोधी वक्तव्यानंतर शनिवारी रात्री मनसे कार्यकर्त्यांनी पनवेलमधील नाईट रायडर्स बारवर हल्ला केला. त्यानंतर पनवेल तालुका पोलीस ठाण्यात हॉटेल चालक रामनाथ शेट्टी यांनी तक्रार दाखल केली. पोलिसांनी योगेश चिले, राहुल चव्हाण, संजय मुरकुटे, किरण गुरव, अक्षय हाके आणि इतर 15 ते 20 मनसेच्या कार्यकर्त्यांविरोधात गुन्हा दाखल केला. याप्रकरणी पोलीस अधिक तपास करत आहेत.