अज्ञात वाहनाची मोटार सायकलला धडक; बँक व्यवस्थापकचा मृत्यू

। माणगाव । सलीम शेख ।

माणगावपासून ६ किमी अंतरावर असणाऱ्या तळेगाव गावच्या हद्दीत हॉटेल सुयश जवळ मुंबई-गोवा महामार्गावर एका अज्ञात वाहनाची मोटार सायकलला धडक लागल्याने झालेल्या अपघातात मोटार सायकल चालकाचा मृत्यू झाला. सदरचा अपघात शुक्रवारी (दि.१३) रात्री 8:15 वाजण्याच्या सुमारास घडला. या घटनेची फिर्याद गौरव शंकर लासूरकर (वय-28) रा. ढालघर फाटा, अशनाझ कॉम्प्लेक्स ता. माणगाव यांनी गोरेगाव पोलीस ठाण्यात दिली.

सदर अपघाताच्या गुन्ह्याबाबत गोरेगाव पोलीस सूत्रांकडून मिळालेली माहिती अशी की, या अपघातातील मयत एसबीआय बँक लोणेरे शाखेचे व्यवस्थापक (मॅनेजर)अमित अशोक कुमार (वय-३८) रा. ढालघर फाटा, अशनाझ कॉम्प्लेक्स ता. माणगाव, मूळ रा. गहीबाजार, राज्य उत्तर प्रदेश. हे लोणेरे ते ढालघर अशी त्यांची मोटार सायकल (एमएच-१२-जीटी-७७३) या गाडीने प्रवास करीत असताना कोणत्यातरी अज्ञात वाहनावरील अज्ञात चालकाने मुंबई बाजूकडून येत-जात असताना मोटार सायकलला जोरदार धडक दिल्याने अपघात घडला. या अपघातात अमित अशोक कुमार यांना गंभीर दुखापत झाल्याने त्यामध्ये त्यांचा मृत्यू झाला.

या अपघाताच्या गुन्ह्याची नोंद गोरेगाव पोलीस ठाण्यात कॉ.गु.रजि.नं.८/२०२३ भादवि संहिता कलम ३०४ अ,२७८,३३७,३३८ मोटार वाहन कायदा कलम १८४,१३४ प्रमाणे दाखल करण्यात आला आहे. सदर अपघाताचा अधिक तपास गोरेगाव पोलीस ठाण्याचे पोलीस निरीक्षक श्रीकृष्ण नावले यांच्या मार्गदर्शनाखाली सहाय्यक पोलीस फौजदार आर.डी.फाळके हे करीत आहेत.