रायगडच्या विकासाला नवी गती!

पेणमध्ये 100 एकरांचा विकास प्रकल्प; ग्रोथ सेंटरमध्ये मॅपलट्रीसोबत करार

| रायगड | प्रतिनिधी |

पेणजवळ विकसित होत असलेल्या रायगड-पेण ग्रोथ सेंटरमध्ये 100 एकरांच्या मिश्र-वापर विकास प्रकल्पासाठी रायगड पेण ग्रोथ सेंटर लिमिटेड आणि मॅपलट्री यांच्यात सामंजस्य करार झाला आहे. या प्रकल्पातून 1.1 अब्ज अमेरिकन डॉलरहून अधिक परकीय थेट गुंतवणूक अपेक्षित असून, रायगडातील उद्योग, व्यवसाय आणि रोजगाराला मोठी चालना मिळण्याची शक्यता आहे.

मॅपलट्रीकडून प्रकल्पासाठी आवश्यक गुंतवणूक तसेच देश-विदेशातील गुंतवणूकदार आणि जागतिक कंपन्यांना आकर्षित करण्यासाठी प्रयत्न केले जाणार आहेत. प्रकल्प व्यवस्थापन सल्लागार म्हणून सुरबाना ज्युराँग यांची नियुक्ती करण्यात आली असून, प्रकल्पाच्या आराखड्यापासून बांधकामाच्या गुणवत्ता नियंत्रणापर्यंत विविध कामांचे परीक्षण संस्थेकडून केले जाणार आहे.

पेण परिसरात सुमारे एक हजार एकर क्षेत्रावर बीकेसीच्या धर्तीवर शहरवजा विकासकेंद्र उभारण्याचे नियोजन आहे. सार्वजनिक-खासगी भागीदारीतून विकसित होणाऱ्या या केंद्रात उद्योग, व्यवसाय, शिक्षण आणि आधुनिक पायाभूत सुविधांचा विस्तार करण्याचा प्रयत्न आहे. मुंबई ट्रान्स हार्बर लिंक, नवी मुंबई आंतरराष्ट्रीय विमानतळ, जेएनपीए आणि रेल्वे जोडणीमुळे पेण परिसराला मिळालेल्या भौगोलिक लाभाचा या प्रकल्पाला मोठा फायदा होण्याची शक्यता आहे.

ग्रोथ सेंटरमुळे रायगडमध्ये जागतिक कंपन्या, व्यवसाय केंद्रे, शिक्षण संस्था आणि विविध उद्योग येण्याची शक्यता आहे. त्यामुळे स्थानिक तरुणांसाठी रोजगाराच्या नव्या संधी निर्माण होण्याबरोबरच मुंबईकडे होणारे स्थलांतर कमी होण्यास मदत होऊ शकते.

32 गावांच्या विकासालाही चालना
पेण, पनवेल आणि उरण तालुक्यातील 32 गावांचा समावेश असलेल्या या व्यापक विकास क्षेत्राला आता एमएमआरडीएच्या माध्यमातून नियोजनबद्ध विकासाची दिशा मिळत आहे. पूर्वी विविध प्रकल्पांसाठी संपादित झालेल्या आणि वापराविना पडून असलेल्या जमिनींचा नियोजनबद्ध वापर करण्याचा प्रयत्न या माध्यमातून केला जाणार आहे.