मोटार सायकल चोरी करणार्‍यास अटक; 19 गुन्ह्यांची कबुली

| पनवेल । वार्ताहर ।

नवी मुंबई परिसरात बनावट चावीव्दारे मोटर सायकलची चोरी करून त्यातले सुट्टे पार्टची विक्री तसेच स्वतःच्या गॅरेजमध्ये पार्टची अदलाबदली करून चोरलेल्या मोटारसायकली भंगार स्क्रॅप दुकानदाराला विक्री करणार्‍या सराईत गुन्हेगारास रबाळे पोलिसांनी गजाआड केले असून, त्याच्याकडून 19 गुन्हे उघडकीस आणले आहे.

नवी मुंबई हद्दीमध्ये मोटर सायकल चोरीचे प्रमाणे वाढले होते. त्या अनुषंगाने चोरीच्या गुन्हयास आळा घालण्यासाठी गुन्हे शाखेचे वपोनि डी.डी. ढाकणे, बी.एन.औटी यांचे अधिपत्याखाली गुन्हे प्रकटीकरण पथकातील अधिकारी व अंमलदार यांनी मोटर सायकल चोरीच्या घटना जास्त प्रमाणात घडणा-या ठिकाणी सातत्याने वॉच ठेवणेची व घडलेल्या गुन्हयांचा अभ्यास करणेची कार्यवाही सुरू केली. या दरम्यान इसम एका दुचाकीवरून येवुन हातात पिशवी घेऊन तो ऐरोली रेल्वे स्टेशन समोर पार्क असणार्‍या दुचाकी वाहनांची संशयास्पद हालचाली करीत होता. वॉचकामी असणार्‍या पथकाने त्यास पकडले असता त्याचे ताब्यात एक पिशवी मिळुन येवुन त्यामध्ये मोटर सायकलच्या चाव्या, स्क्रू ड्रायव्हर, कटर, पकड इत्यादी संशयास्पद साहित्य दिसुन आले.

त्याचेकडे सखोल तपास असता त्याचे नाव नासीर सद्दन खान (वय 58) असून तो मोटर सायकल मॅकेनिक असल्याचे समजले. पोलिसांनी त्याच्याबद्दल अधिक माहिती काढली असता त्याच्यावर वेगवेगळ्या पोलीस ठाण्यात 46 मोटार सायकल चोरीचे गुन्हे दाखल असून त्याला दोन वर्षासाठी नवीमुंबई व ठाणे जिल्हयातुन हददपार केलेले आहे. या दरम्यान पथकाने सीसीटिव्ही फुटेज चेक केले एका होंडा शाईन मोटारसायकलची चोरी करणारा इसम हाच असल्याचे निष्पन्न झाल्याने त्यास तात्काळ अटक करण्यात आली. त्याच्याकडून पोलिसांनी 9 लाख 20 हजार 200 रूपये किंमतीच्या 27 मोटार सायकल जप्त केले असून, त्याने चोरी केलेल्या आठ मोटार सायकल बेवारस स्थितीत असल्याने यापुर्वीच जप्त केलेले आहेत. तर आरोपीने अजुन 15 मोटार चोरी केल्याचे असल्याची कबुली दिली आहे.