मोठी बातमी! मुंबई विमानतळ, ताज हॉटेल बॉम्बने उडवण्याची धमकी

पोलीस आणि सुरक्षा यंत्रणा सतर्क

। मुंबई । प्रतिनिधी ।

मुंबई आंतरराष्ट्रीय विमानतळ आणि ताज हॉटेल बॉम्बने उडवण्याची धमकी मुंबई विमानतळ पोलिसांच्या ईमेल आयडीवर पाठवण्यात आली आहे. याप्रकरणी गुन्हा दाखल करून सर्व यंत्रणांना सतर्क करण्यात आले आहे. धमकीच्या ईमेलमध्ये दहशवादी अफजल गुरू याच्या नावाचा उल्लेख करण्यात आल्याची माहिती मिळत आहे.

मुंबईतील विमानतळ पोलिसांना अज्ञात व्यक्तीने ईमेल केला आहे. मुंबईतील छत्रपती शिवाजी महाराज आंतरराष्ट्रीय विमानतळ आणि ताज महल पॅलेस हॉटेल पाईप बॉम्बने उडवून देण्याची धमकी दिली आहे. संसदेवरील हल्ल्याप्रकरणी फाशी झालेला दहशतवादी अफजल गुरूला फाशी दिल्याचा आणि सॅवक्कू शंकर याच्या नावाचा उल्लेख या ईमेलमध्ये करण्यात आला आहे. मेल पाठवणाऱ्या विरोधात गुन्हा दाखल करण्यात आला असून मुंबई पोलीस ईमेल पाठवणाऱ्याचा शोध घेण्यासाठी कार्यरत झाले आहेत.

तसेच, धमकीचा ईमेल मिळाल्यानंतर सुरक्षा यंत्रणा सतर्क झाल्या असून संपूर्ण मुंबईत लष्करी दल तैनात करण्यात आले आहे. दरम्यान, मुंबईच्या छत्रपती शिवाजी महाराज आंतरराष्ट्रीय विमानतळ आणि ताज हॉटेलवर डॉग स्क्वॉडच्या पथकाने प्रत्येक कोपऱ्याची तपासणी केली आहे. तसेच, मुंबई विमानतळ आणि ताज महल पॅलेस हॉटेलबाहेर पोलिसांचा बंदोबस्त वाढवण्यात आला आहे.

यापूर्वीही मुंबईत येत्या तीन दिवसात बॉम्बस्फोट होणार असल्याचा ईमेल 13 मे रोजी मंत्रालयातील आपत्ती व्यवस्थापन विभागाला मिळाला होता. त्याबाबत पोलिसांना कळवण्यात आले असून सायबर पोलीस अधिक तपास करत आहेत. आता विमानतळ पोलिसांनाही ईमेल मिळाला आहे. त्याच्या सत्यतेबाबत पोलीस तपास करत आहेत.