आली रे आली.. ‘मुंबई इंडियन्स’ची दुसरी ट्रॉफी आली..

दिल्ली कॅपिटल्सची पराभवाची हॅटट्रिक

। मुंबई । प्रतिनिधी ।

वूमन्स प्रीमियर लीग २०२५ स्पर्धेचे विजेतेपद मुंबई इंडियन्सने जिंकले आहे. त्यांनी अंतिम सामन्यात ब्रबॉर्न स्टेडियमवर दिल्ली कॅपिटल्सला ९ धावांनी पराभवाचा धक्का दिला आहे. याआधी मुंबईने २०२३ मध्ये पहिल्यांदा विजेतेपद मिळवले होते. त्यावेळीही याच मैदानावर मुंबईने दिल्लीचा पराभूत केले होते. विशेष म्हणजे दिल्ली सलग तिसऱ्यांदा अंतिम सामन्यात पराभूत झाली असून त्यांना तिसऱ्यांदा उपविजेतेपदावर समाधान मानावे लागले आहे. या सामन्यात मुंबईने दिल्लीसमोर विजयासाठी १५० धावांचे लक्ष्य ठेवले होते. या लक्ष्याचा पाठलाग करताना दिल्लीला २० षटकात ९ बाद १४१ धावाच करता आल्या.

दरम्यान, दिल्ली कॅपिटल्सने नाणेफेक जिंकून प्रथम गोलंदाजी करण्याचा निर्णय घेतला होता. त्यामुळे मुंबईला प्रथम फलंदाजीसाठी उतरावे लागले. मुंबईकडून यास्तिका भाटिया आणि हेली मॅथ्यूजने सलामीला फलंदाजी केली. मात्र, त्या दोघींनाही मारिझान कापने बाद केले. यानंतर नतालिया सायव्हर-ब्रंट आणि कर्णधार हरमनप्रीत कौर यांनी डाव सावरताना ८९ धावांची भागीदारी करत संघाला १०० धावांचा टप्पा ओलांडून दिला होता. परंतु, नतालिया २८ चेंडूत ३० धावा करून बाद झाली. तिला नल्लापुरेड्डी चरानीने मिन्नू मणीच्या हातून झेलबाद केले. यानंतर एमेलिया केर (२) आणि सजीवन सजना (०) याही स्वस्तात झाल्या. १८ व्या षटकात हरमनप्रीतला ऍनाबेल सदरलँड्सने मारिझान कापच्या हातून झेलबाद केले. हरमनप्रीतने ४४ चेंडूत ६६ धावांची खेळी केली. जी कामिलीनीही १० धावांवर नल्लापुरेड्डी चरानीविरुद्ध खेळताना यष्टीचीत झाली. त्यामुळे मुंबईला २० षटकात ७ बाद १४९ धावा करता आल्या. अमनज्योत कौर (14) आणि संस्कृती गुप्ता (8) नाबाद राहिल्या. दिल्लीकडून मारिझान काप, जेस जोनासन आणि नल्लापुरेड्डी चरानी यांनी प्रत्येकी २ बळी घेतले. तर, ऍनाबेल सदरलँडने १ बळी घेतला.

मुंबईने दिलेल्या १५० धावांचा पाठलाग करताना दिल्ली कॅपिटल्सकडून कर्णधार मेग लॅनिंग आणि शफाली वर्मा या सलामीला फलंदाजीला उतरल्या होत्या. मात्र, दोघीही झटपट बाद झाल्या. लॅनिंगला दुसऱ्या षटकात नतालिया सायव्हर-ब्रंटने १३ धावावंर त्रिफळाचीत केले. शफली वर्माला तिसऱ्या षटकात शबनीम इस्माईलने ४ धावांवर पायचीत केले. त्यानंतर जेस जोनासेनला १३ धावांवर एमेलिया केरने यष्टीरक्षक यास्तिका भाटियाच्या हातून झेलबाद केले. ऍनाबेल सदरलँड २ धावांवर सायका इशाकविरुद्ध खेळताना यष्टीचीत झाली. तरी एक बाजू जेमिमाह रोड्रिग्स सांभाळत होती. परंतु, जेमिमा २१ चेंडूत ३० धावावंर बाद झाली. तिला ११ व्या षटकात एमेलिया केरने तिच्याच गोलंदाजीवर झेल घेत बाद केले. त्यानंतर मारिझानने आक्रमक खेळ सुरू केला. परंतु, चोरटी धाव घेताना साराह ब्रायसला संस्कृती गुप्ताच्या थ्रोवर यास्तिका भाटियान ५ धावांवर धावबाद केले. त्यानंतर मोक्याच्या क्षणी मारिझान कापला १८ व्या षटकात नतालिया सायव्हर-ब्रंटने बाद केले. मारिझानने ३६ चेंडूत ४० धावांची झुंज दिली. तिच्यापाठोपाठ पुढच्याच चेंडूवर नतालियाने शिखा पांडेला त्रिफळाचीत केले. मिन्नू मणीही ४ धावांवर बाद झाली. अखेर निकी प्रसादने प्रयत्न केले. परंतु, दिल्लीला ९ धावा कमी पडल्या. निकीने २३ चेंडूत नाबाद २५ धावा केल्या. मुंबईकडून गोलंदाजी करताना नतालिया सायव्हर ब्रंटने ३ बळी घेतले. एमेलिया केरने २ बळी घेतले. तर, शबनीम इस्माईल, हेली मॅथ्यूज आणि सायका इशाक यांनी प्रत्येकी १ बळी घेतला.