पर्यटकांच्या सुरक्षेसाठी पोलिसांकडून सूचनाफलके

| पनवेल | वार्ताहर |
पनवेल परिसरात असलेल्या नदी, डोह व धबधब्यांवर पनवेलसह नवी मुंबई, मुंबई, ठाणे आदी ठिकाणांवरून पर्यटक दरवर्षी पावसाळ्याच्या वेळी वर्षासहली साठीयेत असतात. अशा वेळी त्यांना पावसाचा व वाहत्या पाण्याचा अंदाज न आल्याने ते पाण्यात वाहून जाऊन अनेकांचा नाहक जीव जातो, तर कित्येक जण जखमी होतात. हे टाळण्यासाठी पनवेल तालुका पोलीस ठाण्याच्या वतीने वरिष्ठ पोलीस निरीक्षक रवींद्र दौंडकर यांनी मार्गदर्शनपर सूचना फलके लावली आहेत.

या परिसरात अंमली पदार्थ, दारू अथवा तत्सम मादक द्रव्य आणण्यास व पिण्यास मनाई आहे. सदर परिसरात अंमली पदार्थ, दारू अथवा तत्सम मादक द्रव्य बाळगताना अगर पिताना कोणी आढळल्यास कठोर कायदेशीर कारवाई करण्यात येईल. सदरचा परिसर हा डोंगराळ असून, रस्ते अरूंद आहेत. त्यामुळे एखादी दुर्घटना घडल्यास अग्निशमन वाहने, अ‍ॅम्ब्युलन्स यांना जाण्या येण्यासाठी रस्ता खुला रहावा. यासाठी रहदारीस अडथळा निर्माण होईल अशा त-हेने रस्त्याच्या कडेला वाहने उभी करू नयेत. रहदारीस अडथळा निर्माण होईल अशा त-हेने उभे करण्यात आलेले वाहनचालकावर मोटर वाहन कायद्यानुसार कारवाई करण्यात येईल. सदर परिसरात पावसाळी पर्यटकांना गाढेश्‍वर धरण, वारदोली धबधबा मोर्बे धरण, कुंडी धबधबा (अर्पिता फार्म हाऊस जवळील धबधबा ), हरिग्राम नदीपात्र, धोदाणी नदीपात्र, चिंध्रण व मोहोदर नदीपात्र, शांतीवन नदीपात्र, माची प्रबळ, कर्नाळा अभयारण्य भेटी देण्यास प्रतिबंधीत करण्यात आलेले आहे, असे पोलिसांकडून सांगण्यात आले आहे.