पाली नगरपंचायतीचे पाणी साठवणुकीवर भर

आंबा नदीवर दोन लघु बंधाऱ्यांची उभारणी पूर्ण; केटी बंधाऱ्यावर प्लेट लावण्याच्या काम सुरु

| सुधागड-पाली | प्रतिनिधी |

यंदा पावसाचे प्रमाण कमी राहिल्याच्या पार्श्वभूमीवर आगामी उन्हाळ्यात पाली शहराला पाणीटंचाईचा सामना करावा लागू नये, यासाठी पाली नगरपंचायतीने पाणी साठवणूक आणि पाणीपुरवठ्याच्या नियोजनावर भर दिला आहे. उपलब्ध पाणीसाठा अधिक काळ टिकवून ठेवण्यासाठी आंबा नदीवर दोन ठिकाणी लघु बंधाऱ्यांची उभारणी पूर्ण करण्यात आली आहे. तसेच दरवर्षी डिसेंबर महिन्यात पाणी अडवण्यासाठी पाटबंधारे विभागाच्या केटी बंधाऱ्यावर प्लेट लावण्यात येतात; मात्र यंदा हे काम ऑक्टोबर महिन्यातच सुरू झाले आहे. यासाठी नगरपंचायतीने पाटबंधारे विभागाकडे पत्रव्यवहार करून लवकर काम सुरू करण्याची मागणी केली होती. त्याला सकारात्मक प्रतिसाद मिळाल्याने प्लेट लावण्याचे काम सुरू झाले आहे. यासोबतच पाणीपुरवठा करणाऱ्या पाइपलाइनमधील गळती रोखण्यावरही लक्ष केंद्रित करण्यात आले आहे.

दरवर्षी डिसेंबर महिन्यात पाटबंधारे विभागामार्फत केटी बंधाऱ्यावर प्लेट लावून नदीतील पाणी अडवले जाते. मात्र, यंदा पावसाचे प्रमाण कमी राहिल्याने उपलब्ध पाण्याचे नियोजन वेळेत करणे आवश्यक बनले आहे. ही बाब लक्षात घेऊन पाली नगरपंचायतीने केटी बंधाऱ्यावर प्लेट लावण्याची प्रक्रिया नेहमीपेक्षा लवकर सुरू करण्यासाठी पाठपुरावा केला. नगराध्यक्ष, उपनगराध्यक्ष आणि नगरसेवकांनी यासंदर्भात पाटबंधारे विभागाकडे पत्रव्यवहार करून ऑक्टोबर महिन्यातच प्लेट लावण्याचे काम सुरू करण्याची मागणी केली. या मागणीला पाटबंधारे विभागाच्या अधिकाऱ्यांनी सकारात्मक प्रतिसाद दिल्यानंतर प्रत्यक्ष कामाला सुरुवात झाली आहे.

वेळेत पाणी अडवण्याची व्यवस्था झाल्याने नदीतील उपलब्ध पाणीसाठा टिकवून ठेवण्यास मदत होण्याची अपेक्षा आहे. उन्हाळ्यात पाणीटंचाई निर्माण झाल्यानंतर उपाययोजना करण्याऐवजी संभाव्य परिस्थितीचा विचार करून आधीपासूनच नियोजन करण्यावर नगरपंचायतीने भर दिला आहे. आंबा नदीतील पाणी अधिक काळ उपलब्ध राहावे, यासाठी पाली नगरपंचायतीने नदीवर दोन ठिकाणी लघु बंधारे उभारले आहेत. त्यापैकी एक बंधारा जॅकवेलजवळ, तर दुसरा पेठे परिसरात बांधण्यात आला असून दोन्ही बंधाऱ्यांची उभारणी पूर्ण झाली आहे.

या बंधाऱ्यांमुळे नदीतील उपलब्ध पाणी अडवून त्याचा साठा टिकवून ठेवण्यास मदत होऊ शकते. केटी बंधाऱ्यावर प्लेट लावण्याचे काम आणि दोन लघु बंधाऱ्यांची उभारणी या माध्यमांतून पाणी साठवणुकीसाठी प्रयत्न करण्यात आले आहेत. आगामी काळात शहराच्या पाणीपुरवठ्यावर ताण निर्माण होऊ नये आणि उपलब्ध पाण्याचा अधिक काळ उपयोग करता यावा, हा या उपाययोजनांमागील प्रमुख उद्देश आहे. पाणीसाठा वाढवणे, नदीतील पाणी अडवणे आणि पाणीपुरवठा यंत्रणेतील गळती रोखणे, अशा विविध उपाययोजनांमुळे उपलब्ध पाण्याचा काटकसरीने वापर करण्यास मदत होणार आहे. पाणीपुरवठा सुरळीत ठेवण्यासाठी आणि भविष्यातील संभाव्य टंचाईचा धोका कमी करण्यासाठी या कामांना महत्त्व आहे.

गळती रोखण्यावर भर
पाणी साठवणुकीबरोबरच उपलब्ध पाण्याचा अपव्यय टाळणेही महत्त्वाचे आहे. यासाठी पाली नगरपंचायतीने पाणीपुरवठा करणाऱ्या पाईपलाईनच्या दुरुस्तीवर लक्ष केंद्रित केले आहे. ज्या ठिकाणी पाईपलाईन खराब झाल्या होत्या किंवा पाण्याची गळती होत होती, त्या ठिकाणी दुरुस्तीची कामे हाती घेऊन गळती रोखण्यात आली आहे.