| खांदा कॉलनी | प्रतिनिधी |
पर्यावरण संवर्धनाचा संदेश देणाऱ्या कागदी गणेशमूर्तींना यंदा परदेशातूनही मोठी मागणी मिळाली आहे. मध्य आफ्रिकेतील रिपब्लिक ऑफ काँगो येथे गणेशोत्सवासाठी नेरूळ येथील मूर्तिकार एम.पी. पवार यांनी साकारलेल्या कागदी श्रीगणेश मूर्ती रवाना झाल्या आहेत.
गेली अनेक वर्षे एम.पी. पवार पर्यावरणपूरक कागदी गणेशमूर्ती तयार करत असून, त्यांच्या मूर्ती भारतासह विविध परदेशी देशांमध्येही पोहोचत आहेत. यंदा आफ्रिकेतील गणेशभक्तांसाठी विशेषतः 6 फूट उंचीची सुमारे 20 किलो वजनाची (लाकडी फळीसह) तसेच 5 फूट उंचीची सुमारे 15 ते 18 किलो वजनाची कागदी गणेशमूर्ती तयार करण्यात आली आहे. हवामान बदल, वाढते प्रदूषण आणि निसर्गावर होणारे परिणाम लक्षात घेता पर्यावरणपूरक गणेशोत्सव साजरा करण्यावर जगभर भर दिला जात आहे. निसर्गावर होणारा वाढता ताण आता विविध नैसर्गिक आपत्तींच्या माध्यमातून जाणवत असल्याने पर्यावरणाचे संरक्षण ही काळाची गरज बनली आहे. परदेशातील गणेशभक्त पर्यावरण जपण्यासाठी कागदी गणेशमूर्तींचा स्वीकार करत असताना, भारतातील नागरिकांनीही पर्यावरणपूरक गणेशोत्सव साजरा करण्यासाठी एक पाऊल पुढे टाकावे, असे आवाहन मूर्तिकार एम.पी. पवार यांनी केले आहे. त्यांच्या या उपक्रमामुळे महाराष्ट्राच्या कलाकौशल्यासह पर्यावरण संवर्धनाचा संदेश सातासमुद्रापार पोहोचत असल्याने सर्व स्तरातून त्यांचे कौतुक होत आहे.