सरकारी जमीन बळकावण्याचा डाव

पुनाडे प्रकल्पग्रस्तांची जमीन गुजरातच्या संस्थेला; ग्रामस्थांचा तीव्र विरोध

| उरण | प्रतिनिधी |

तालुक्यातील पुनाडे येथील सरकारी जमीन अहमदाबादमधील बोचासनवासी अक्षर पुरुषोत्तम स्वामिनारायण संस्थेला देण्याचा प्रस्ताव पुढे आला असून, यावर ग्रामस्थांनी तीव्र नाराजी व्यक्त केली आहे. हीच जमीन धरण प्रकल्पामुळे बाधित झालेल्या शेतकऱ्यांच्या पुनर्वसनासाठी द्यावी, अशी मागणी 2022 आणि 2023 मध्ये करण्यात आली होती. मात्र, प्रकल्पग्रस्तांच्या मागणीकडे दुर्लक्ष करून बाहेरील संस्थेला जमीन देण्याची प्रक्रिया सुरू असल्याचा आरोप ग्रामस्थांनी केला आहे.

प्रकल्पग्रस्त शेतकरी चंद्रकांत कमल पाटील यांच्यासह शेकडो शेतकऱ्यांनी शासनाला लेखी निवेदन देत जमीन गुजरातमधील संस्थेला देण्याचा निर्णय झाला तर पुनाडे पंचक्रोशीत मोठा जनआक्रोश उसळेल, असा इशारा दिला आहे. 1990 साली लघु पाटबंधारे योजनेंतर्गत धरणासाठी पुनाडे, वशेणी आणि केळवणे गावांतील पिकत्या जमिनी मोठ्या प्रमाणावर संपादित करण्यात आल्या. त्यामुळे अनेक कुटुंबांचे शेतीवरचे उत्पन्नाचे साधन गमावले आणि आजही अनेकजण मोलमजुरीवर उदरनिर्वाह करतात. या पार्श्वभूमीवर प्रकल्पग्रस्तांनी गावातील उपलब्ध शासकीय जमीन पुनर्वसनासाठी द्यावी, अशी मागणी जिल्हाधिकाऱ्यांकडे केली होती.

ग्रामस्थांचे म्हणणे आहे की, आमच्या पिकत्या जमिनी धरणासाठी घेतल्या आणि आता पुनर्वसनाची जमीनही परगावच्या संस्थेला देणार? हा अन्याय आम्ही कोणत्याही परिस्थितीत सहन करणार नाही. याप्रकरणी ग्रामस्थांनी शासन निर्णय रद्द करण्याची, प्रकरणी पुनर्विचार करण्याची आणि जिल्हा तसेच कोकण विभाग पातळीवर जनसुनावणी घेण्याची मागणी केली आहे.