। हल्दवानी । क्रीडा प्रतिनिधी ।
उत्तराखंडातील 38व्या राष्ट्रीय क्रीडा स्पर्धेत महाराष्ट्राच्या प्रतीक्षा डांगीला महिलांच्या 100 मिटर बॅक स्ट्रोक्स प्रकारातही रौप्यपदकावर समाधान मानावे लागले आहे. एका सेंकदाच्या फरकाने तिला सुवर्णपदकाने हुलकावणी दिली. मिहिर आंब्रेने 50 मिटर बटरफ्लायमध्ये रौप्यपदकाची कमाई केली आहे. तसेच, महाराष्ट्राच्या ऋषभ दासला 100 मिटर बॅक स्ट्रोक्स प्रकारात, तर ऋतुजा राजधन्या हिला 50 मिटर बटरफ्लायमध्ये कांस्यपदक जिंकले आहे.
महिलांच्या 100 मिटर बॅक स्ट्रोक्स प्रकारात महाराष्ट्राच्या प्रतीक्षा डांगी हिने 1 मिनिट 7.52 सेकंद वेळेसह रौप्यपदकाला गवसणी घातली. बंगालच्या मोंडल सौब्रितीने 1 मिनिट 6.66 सेकंद वेळेसह सुवर्ण पदकावर आपले नाव कोरले, तर ओडिशाच्या रॉय प्रत्यासाला कांस्यपदक मिळाले आहे. पुरुषांच्या 100 मिटर बॅक स्ट्रोक्स प्रकारात महाराष्ट्राच्या ऋषभ दासला कांस्यपदकावर समाधान मानावे लागले. श्रीहरी नटराज व आकाश मानी या कर्नाटकच्या जलतरणपटूनी अनुक्रमे सुवर्ण व रौप्य पदकावर मोहोर उमटवली आहे. मिहिर आंब्रेने 50 मिटर बटरफ्लायमध्ये रौप्यपदकाची कमाई केली आहे. तमिळनाडूचा बी रोहित आणि हरियाणाचा हर्ष सरोहा यांनी अनुक्रमे सुवर्ण व कांस्यपदक जिंकले. महिलांच्या 50 मिटर बटरफ्लायमध्ये महाराष्ट्राच्या ऋतुजा राजधन्या हिने कांस्यपदक जिंकले आहे.