पर्यावरण सुरक्षाविषयी फॉन संस्थेतर्फे जनजागृती

| उरण | प्रतिनिधी |

कोकण ज्ञानपीठ कला व वाणिज्य महाविद्यालय, उरणच्या एनएसएस विभागाच्या श्रमसंस्कार शिबिर अंतर्गत कर्मवीर भाऊराव पाटील माध्यमिक व उच्च माध्यमिक विद्यालय पिरकोन येथे फ्रेंड्स ऑफ नेचर (फॉन) सर्पमित्र निसर्गसंवर्धन संस्था, चिरनेर-उरणतर्फे पर्यावरण रक्षामानव सुरक्षा या विषयावर उपस्थित विद्यार्थ्यांना मार्गदर्शन करण्यात आले. यावेळी संस्थेचे संस्थापक अध्यक्ष जयवंत रामदास ठाकूर व सदस्य राकेश सुरेश शिंदे यांनी पर्यावरण व मानव- वन्यजीव संघर्ष तसेच सर्प ओळख, सर्पदंश कसे टाळावे व सर्पदंश झाल्यास काय करावे? याविषयी मार्गदर्शन केले. तसेच संस्थेच्या शून्य सर्पदंश मृत्यू अभियान आणि स्नेक बाईट ऍकशन टीम प्रकल्पाबद्दल जनजागृती केली. तसेच संस्थेचे सदस्य निकेतन रमेश ठाकूर यांनी सध्या महाराष्ट्रात सुरू असलेल्या मानव-बिबट्या संघर्ष, बिबट्याचे हल्ले वाढत आहेत; त्याची कारणे व त्यावरील उपाययोजना याबाबत उपस्थित विद्यार्थ्यांना मार्गदर्शन केले. महाविद्यालयाचे प्राध्यापक डॉ. दत्ता हिंगमिरे यांचीही यावेळी उपस्थिती लाभली होती.