श्री महागणपतीच्या दर्शनासाठी रांगा

| चिरनेर | प्रतिनिधी |

रायगड जिल्ह्यातील उरण तालुक्यातील चिरनेर शब्द उच्चारला की, श्री महागणपती व चिरनेर जंगल सत्याग्रह ही दोन नावे पुढे येतात. याच उरण तालुक्यातील चिरनेर महागणपती क्षेत्रात माघी गणेश जयंतीनिमित्ताने गुरुवारी लाखो भाविकांनी प्राचीन जागृत श्री महागणपतीच्या दर्शनाचा लाभ घेतला. रात्री साडेतीन वाजताच मंदिर दर्शनासाठी खुले करण्यात आले. यावेळी प्रथम श्री महागणपतीचा अभिषेक व महापूजा करण्यात आली. त्यानंतर श्रींच्या दर्शनासाठी मंदिर खुले करण्यात आले.

दर्शनासाठी आलेल्या भाविकांनी गणपती बाप्पा मोरया, मंगलमूर्ती मोरयाचा जयघोष करीत भक्तीमय वातावरणात श्रींचे दर्शन घेतले. यावेळी हजारो गणेश भक्तांनी श्रींच्या जन्मोत्सवाच्या कीर्तनातून, श्रवण सुखाचा लाभ घेतला. त्यानंतर दुपारी महाप्रसादाला सुरुवात झाली. आणि या महाप्रसादाचा समस्त चिरनेर गावकऱ्यांनीच नव्हे तर आजूबाजूच्या गावातील गावकरी आणि राज्यातील अनेक भागातून आलेल्या भाविकांनी देखील लाभ घेतला. श्री महागणपतीचे देवस्थान अत्यंत पुरातन व जागृत असून, येथील श्रींच्या दर्शनासाठी मुंबई, नवी मुंबई, पुणे, ठाणे, डोंबिवली, कल्याण, उरण, पनवेल, पेण तसेच राज्याच्या अनेक भागातून, आलेल्या लाखो भाविकांनी पहाटेपासूनच गर्दी केली होती. चिरनेर गावातील माघी गणेशोत्सव हा प्रचंड मोठ्या प्रमाणावर होत असल्याने, संपूर्ण चिरनेर गाव भाविक भक्तांनी फुलून निघाले होते. भक्तगणांची गैरसोय होऊ नये, सर्वांना सुखकर सोयी सुविधा मिळून, रांगेत दर्शन घेता यावे, वाहतूक कोंडी होऊ नये, यासाठी चिरनेर गणपती देवस्थान प्रशासनाकडून कडक बंदोबस्त आणि आवश्यक सुसज्ज नियोजन करण्यात आले होते. उत्सवानिमित्त चिरनेरच्या नागरिकांनी भक्तांच्या स्वागतासाठी जागोजागी स्वागत फलक उभे केले होते. तसेच विविध महत्त्वाच्या ठिकाणी स्वागत कमानी देखील उभारल्या होत्या. श्रींच्या दर्शनासाठी आलेल्या गणेश भक्तांच्या अफाट गर्दीमुळे चिरनेरच्या पावन तीर्थात भक्तीमय वातावरण निर्माण झाले होते.