शेती वाचवण्यासाठी धरणांमधील पाणी सोडा

आगरी समाज संघटनेची जलसंपदा विभागाकडे मागणी

| नेरळ | प्रतिनिधी |

पाऊस येण्याची कोणतीही लक्षणे दिसत नाहीत आणि त्यामुळे जलसंपदा विभागाने आपल्या तालुक्यात असलेल्या धरणातील पाणी शेतीसाठी सोडावे अशी मागणी करणारे निवेदन कर्जत तालुका आगरी समाज संघटनेचे वतीने देण्यात आले. कर्जत तालुक्यातील शेतकऱ्यांच्या दृष्टीने पावसाचे पाणी महत्त्वाचे असल्याने अत्यंत जिव्हाळ्याचे विषयी मागणी पुढे आली आहे. दरम्यान, प्रशासनाकडून या बाबत सकारात्मक निर्णय घेतला जाईल असे आश्वासन जलसंपदा विभागाचे उप अभियंता अमित पारधे यांनी दिले आहे. तर तहसीलदार डॉ. धनंजय जाधव यांनी 22 ऑक्टोबर रोजी होणाऱ्या दुष्काळ आढावा बैठकीत या विषयावर यावेळी निर्णय घेतला जाईल अशी माहिती कर्जत तालुका अध्यक्ष संतोष पेरणे यांना दिली आहे.

मात्र, तालुक्यातील राजनाला कालवा आणि काही पाझर तलाव तसेच लघुपाटबंधारे प्रकल्प येथून शेतकऱ्यांनी भाताची शेती वाचवण्यासाठी पाणी मिळाले तर भाताचे पीक शेतकऱ्यांना मिळू शकेल. भाताच्या शेतात आज भात हिरवागार असून भाताचे पीक तयार होण्यास आणखी काही अवधी आहे. ही बाब लक्षात घेऊन जलसंपदा विभागाने आपल्या अखत्यारीत असलेल्या जलसाठ्यामधून शेतीसाठी काही प्रमाणात पाणी सोडावे आणि त्यामुळे त्या पाण्याचा फायदा कर्जत तालुक्यातील शेतकऱ्यांना होऊ शकतो. तालुक्यात अवसरे, पाली भूतिवली, पाषाणे येथे असलेल्या लघुपाटबंधारे प्रकल्पामधून तसेच डोंगरपाडा, सोलनपाडा, खांडस, खांडपे, कशेळे, साळोख येथील पाझर तलावामधून खरीप हंगामातील शेती वाचवण्यासाठी पाणी वितरण करण्याची व्यवस्था करावी अशी मागणी कर्जत तालुका आगरी समाज संघटना यांनी केली आहे.

शेतकऱ्यांसाठी जलसंपदा विभाग पाण्याचे वितरण रब्बी हंगामात करीत असते. यावर्षी पाऊस लवकर गेल्याने शेती धोक्यात आली आहे. ही बाब लक्षात घेऊन शेतकऱ्यांसाठी आम्ही कर्जत तालुका आगरी समाज संघटनेची मागणी पुढे वरिष्ठांकडे पाठवत आहोत. शासन देखील सकारात्मक निर्णय घेईल अशी अपेक्षा आहे.

–अमित पारधे
उपअभियंता जलसंपदा