नागोठण्यातील पाणीपुरवठा झाला सुरळीत
। नागोठणे । वार्ताहर ।
नागोठणे शहरातील बहुतांश भागाला पाणीपुरवठा करणार्या महाराष्ट्र औद्योगिक विकास महामंडळाच्या जलवाहिनीचे दुरुस्तीचे काम सोमवारी (दि.29) रात्री 12.30 वाजण्याच्या सुमारास पुर्ण करण्यात आले. त्यानंतर थोड्याच वेळाने नागोठणे शहराचा पाणीपुरवठा रात्रीच सुरु करण्यात आल्याची माहिती नागोठणे ग्रामपंचायतीचे सरपंच डॉ. मिलिंद धात्रक यांच्याकडून देण्यात आली.
नागोठणे शहराला पाणीपुरवठा करणारी एमआयडीसीची ही मुख्य जलवाहिनी वरवठणे गावाच्या हद्दितील एका शेतात मोठ्या प्रमाणात फुटली होती. त्यामुळे या जलवाहिनीवर अवलंबून असलेल्या नागोठणे शहरातील बहुतांशी भागाचा पाणीपुरवठा बंद करण्यात आला होता. या जलवाहिनीच्या दुरूस्तीचे काम सरपंच डॉ. मिलिंद धात्रक यांच्या मार्गदर्शनाखाली सुरु करण्यात आले होते. या दुरूस्तीच्या कामासाठी आवश्यक असलेले साहित्यही तातडीने बाहेरून मागविण्यात आले होते.