मोर्बा रोड कालवा मार्ग ते महामार्ग सर्व्हिस रोडची दुरवस्था
| माणगाव | प्रतिनिधी |
माणगाव शहरातील वाहतूक कोंडी कमी करण्यासाठी अत्यंत महत्त्वाचा मानला जाणारा मोर्बा रोड कालवा मार्ग ते महामार्ग जोडणारा सर्व्हिस रोड दुरवस्थेच्या खाईत सापडला आहे. ठिकठिकाणी पडलेल्या मोठमोठ्या खड्ड्यांमुळे हा मार्ग वाहनचालकांसाठी धोकादायक बनला आहे. नागरिकांना रोज जीव मुठीत धरून प्रवास करावा लागत आहे. निधीअभावी या रस्त्याचे काम गेल्या सहा महिन्यांपासून रखडल्याने नागरिकांमध्ये तीव्र नाराजी व्यक्त होत आहे.
माणगाव शहरातील वाढती वाहतूक आणि सततची कोंडी लक्षात घेऊन माणगाव बायपास आणि मोर्बा रोड कालवा मार्ग ते महामार्ग असा सर्व्हिस रोड मंजूर करण्यात आला होता. बायपास मार्गाचे काम सुरू झाले असले तरी कालवा मार्गावरील सर्व्हिस रोड अद्याप पूर्णत्वास जाऊ शकलेला नाही. परिणामी, शहरातील वाहतूक कोंडीचा प्रश्न दिवसेंदिवस अधिक गंभीर होत चालला आहे. सध्या म्हसळा, श्रीवर्धन आणि हरिहरेश्वरकडे जाणारी मोठ्या प्रमाणातील वाहतूक याच अरुंद आणि खराब मार्गावरून सुरू आहे. मात्र या मार्गावर सर्वत्र खड्डे पडल्याने वाहनचालकांना अक्षरशः तारेवरची कसरत करावी लागत आहे. दुचाकीस्वार, रिक्षाचालक तसेच चारचाकी वाहनधारकांना मोठ्या अडचणींचा सामना करावा लागत असून काही ठिकाणी अपघातांच्याही घटना घडत आहेत. त्यामुळे स्थानिक नागरिकांमध्ये भीतीचे वातावरण निर्माण झाले आहे.
पावसाळा अगदी तोंडावर येऊन ठेपला असताना या रस्त्याची अवस्था आणखी बिकट होण्याची शक्यता व्यक्त केली जात आहे. पावसाळ्यात खड्ड्यांमध्ये पाणी साचल्यास अपघातांचा धोका अधिक वाढणार असून नागरिकांना वाहतूक कोंडी आणि त्रासाचा सामना करावा लागणार आहे. तत्कालीन उपमुख्यमंत्री अजित पवार यांनी या महत्त्वाच्या सर्व्हिस रोडसाठी सुमारे दहा कोटी रुपयांचा निधी मंजूर केला होता. रस्ता विना अडथळा होण्यासाठी मार्गावरील अतिक्रमणे आणि अनधिकृत बांधकामे हटविण्यात आली होती. तसेच या रस्त्याचे रुंदीकरणही करण्यात आले होते. एका बाजूचे डांबरीकरण पूर्ण झाल्यानंतर वाहतुकीसाठी मार्ग खुला करण्यात आला होता. मात्र त्यानंतर लगेचच अवजड वाहनांची वाहतूक सुरू झाली आणि अतिवृष्टीमुळे रस्ता अनेक ठिकाणी खचला. परिणामी संपूर्ण मार्गावर मोठमोठे खड्डे पडून रस्ता धोकादायक बनला आहे. हा मार्ग शॉर्टकट असल्याने दररोज हजारो वाहने या रस्त्यावरून प्रवास करत असतात. त्यामुळे या रस्त्याची दुरुस्ती आणि उर्वरित काम पूर्ण करणे अत्यंत गरजेचे असल्याची मागणी नागरिकांकडून होत आहे.
नागरिकांमध्ये तीव्र नाराजी
खासदार सुनील तटकरे तसेच माणगाव नगरपंचायतीकडून निधीसाठी प्रयत्न सुरू असल्याचे सांगितले जात असले, तरी अद्याप निधी उपलब्ध झालेला नाही. दरम्यान, माणगाव शहरातील कोट्यवधी रुपयांचे अंतर्गत रस्ते मंजूर झाले असताना शहराच्या वाहतुकीसाठी अत्यंत महत्त्वाचा असलेला हा सर्व्हिस रोड रखडल्याने नागरिकांमध्ये तीव्र नाराजी व्यक्त होत आहे. हा रस्ता पूर्ण झाल्यास शहरातील वाहतूक कोंडी मोठ्या प्रमाणात कमी होईल आणि प्रवाशांचा प्रवास सुखकर बनेल, अशी अपेक्षा स्थानिक नागरिक व्यक्त करत आहेत.