जिल्हा ग्रंथालय संघाचे प्रमुख कार्यवाह संजय भायदे यांचे बस अपघातात निधन, सात जखमी

| अलिबाग | विशेष प्रतिनिधी |
उरुळी देवाची हद्दीत पुणे-सासवड रोडवरील ऊरळी देवाची येथे रविवारी मध्यरात्री भीषण अपघात झाल्याची घटना समोर आली आहे. एका कंटेनर आणि शिवशाही बस यांमध्ये जोरदार धडक होऊन हा अपघात झाला आहे. या अपघातात रायगड जिल्हा ग्रंथालय संघाचे प्रमुख कार्यवाह संजय भायदे यांचे निधन झाले असून सात जण गंभीर जखमी झाले आहेत. जखमींना जवळच्या रुग्णालयात दाखल करण्यात आले असून त्यांच्यावर उपचार सुरू आहेत.

रायगड जिल्हा ग्रंथालय संघाचे प्रमुख कार्यवाह मुरुड सार्वजनिक वाचनालयाचे ग्रंथपाल संजय भायदे हे राज्य ग्रंथालय संघाच्या सभेसाठी पंढरपूर येथे गेले होते. तिथून परतत असताना हा अपघात झाला.

पुणे सासवड रोडवर उरुळी देवाची फाट्याजवळ ही भीषण दुर्घटना घडली. उरुळी देवाची फाट्याजवळ असलेल्या एका गोडाऊनमधून कंटेनर निघाला होता. तो सासवड रस्त्यावर येत होता. नेमक्या याच वेळी पुण्याच्या दिशेने येत असलेल्या एका शिवशाही बसच्या चालकाला वेग नियंत्रित करता आला नाही. अखेर रस्त्यावर आडव्या दिशेत असलेल्या कंटेनरला भरधाव शिवशाही बसने जोरदार धडक दिली.

पंढरपूरहून प्रवाशांना घेऊन पुण्याच्या दिशेनं जात असताना शिवशाही बसचा अपघात झाला. भरधाव शिवशाही बसची ही धडक इतकी भीषण होती, की चालकासह प्रवासी गंभीररीत्या जखमी झाले. यात कंटनेरचंही नुकसान झालं, तर शिवशाही एसटी बसलाही फटका बसला. शिवशाही बस आणि कंटेनरच्या या अपघाताची माहिती मिळताच पोलिसांनी घटनास्थळी धाव घेतली. त्यानंतर बचावकार्य करण्यात आलं.

रुग्णवाहिकेच्या मदतीने जखमींना रुग्णालयात उपचारासाठी पाठवलं. तर क्रेनच्या मदतीने अपघातग्रस्त शिवशाही बसला रस्त्यावरुन बाजूला हटवण्यात आलं. दरम्यान, या अपघातामुळे उरुळी देवाची फाट्याजवळ वाहतुकीची प्रचंड कोंडी झाली होती. लांबच लांब वाहनांच्या रांगा लागल्या होत्या. अखेर अपघातग्रस्त बस हटवल्यानंतर या मार्गावरची वाहतूक पूर्ववत करण्यासाठी प्रयत्न करण्यात आले.