लाल मैदानात रंगला अंतिम थरार
। मुंबई । प्रतिनिधी ।
मुंबई खो-खो संघटनेच्या मान्यतेने विद्यार्थी क्रीडा केंद्र आयोजित किशोर गट (4 फुट 11 इंच) व व्यावसायिक पुरुष-महिला गटाच्या खो-खो स्पर्धा परळ येथील लाल मैदानात पार पडल्या. या स्पर्धेत किशोर गटात सरस्वती स्पोर्ट्स क्लब अंतिम विजयी झाले असून व्यावासायिक पुरूषांमध्ये मध्य रेल्वे तर महिलांमध्ये रचना नोटरी वर्क्स अंतिम विजयी झाले आहेत.

व्यावसायिक पुरुष गटाच्या अंतिम सामन्यात मध्य रेल्वेने पश्चिम रेल्वेचा 17-14 असा 3 गुणांनी पराभव केला. मध्य रेल्वेतर्फे दिलीप खांडवीने 1:10, 2:20 मिनिटे संरक्षण करून आक्रमणात 2 गडी बाद केले. अवधूत पाटीलने 1:30, 2:20 मिनिटे संरक्षण करून आक्रमणात 2 गडी बाद केले. मिलिंद चावरेकर व रोहन शिंगाडेने प्रत्येकी 1:00, 1:20 मिनिटे संरक्षण करून आक्रमणात प्रत्येकी 4 गडी बाद केले. व्यावसायिक महिला गटाच्या अंतिम सामन्यात रचना नोटरी वर्क्सने महावितरण कंपनी संघाचा 11-10 असा 1 गुण व 1:10 मिनिटे राखुन पराभव केला. रचनातर्फे पुजा फरगडेने 2:00, 2:30 मिनिटे संरक्षण करून आक्रमणात 3 खेळाडू बाद केले. श्वेता जाधवने 2:20 मिनिटे संरक्षण करून आक्रमणात 4 खेळाडू बाद केले. सेजल यादवने 3:20, 1:40 मिनिटे संरक्षण केले.
किशोर गटाच्या अंतिम सामन्यात सरस्वती स्पोर्ट्स क्लबने विद्यार्थी क्रीडा केंद्राचा 4-3 असा 1 गुण व 5:30 मिनिटे राखून पराभव केला. सरस्वतीतर्फे मेहक आदवडेने नाबाद 6:00, नाबाद 3:10 मिनिटे संरक्षण करून आक्रमणात 1 गडी बाद केला. वरुण गुप्ताने 2:50 मिनिटे संरक्षण करून आक्रमणात 1 गडी बाद केला. शिवम झाने 1:00, 1:00 मिनिटे संरक्षण केले. विद्यार्थीतर्फे अपसर शेखने 3:20 मिनिटे संरक्षण केले. पवन गुरवने 1:00 मिनिटे संरक्षण करून आक्रमणात 1 गडी बाद केला. ओमकार जाधवने 2:30 मिनिटे संरक्षण केले.
तसेच, व्यावसायिक महिला गटाच्या तृतीय क्रमांकाच्या सामन्यात महाराष्ट्र पोस्टाने मुंबई पोलीस संघाचा 9-8 असा 1 गुणांनी पराभव केला. तर, व्यावसायिक पुरुष गटाच्या तृतीय क्रमांकाच्या सामन्यात रचना नोटरी वर्क्सने महाराष्ट्र पोस्टने संघाचा 12-11 असा 1 गुण व 3:10 मिनिटे राखून पराभव केला. तसेच, किशोर गटाच्या तृतीय क्रमांकाच्या सामन्यात ओम साईश्वर सेवा मंडळाने ओम समर्थ भारत व्यायाम मंदिराचा 10-4 असा 1 डाव व 6 गुणांनी पराभव केला.