शेकापने दिलेला शब्द पाळला

शिवानी जंगम यांचा स्वीकृत नगरसेवकपदाचा राजीनामा

| खोपोली | प्रतिनिधी |

खालापूर नगरपंचायतीच्या निवडणूक लढविण्यासाठी माघार घेऊन पक्षाचे उमेदवार निवडून आणण्यासाठी प्रामाणिक प्रयत्न करणाऱ्या सचिन कांबळे (भीम) याला स्वीकृत नगरसेवक बनवले आहे. शेकापक्षाचे नेते उपनगराध्यक्ष संतोष जंगम अणि माजी नगराध्यक्ष शिवानी जंगम यांनी दिलेला शब्द पाळत बौद्ध समाजातील तरुणाला नगरसेवक बनविल्याने कौतुक होत आहे.

खालापूर नगरपालिकेच्या निवडणुकीत शेकापक्षाने उमेदवार निवडून आल्यानंतर त्यांच्या जोडीला अभ्यासू नेतृत्व असावं म्हणून स्वीकृत नगरसेवकपदी माजी नगराध्यक्ष शिवानी जंगम यांची निवड केली होती. शिवानी जंगम यांनी आपल्या स्वीकृत नगरसेवक पदाचा राजीनामा दिल्यानंतर स्वीकृत नगरसेवकपदी कोणाची निवड होणार याकडे साऱ्यांचे लक्ष लागले असतानाच उपनगराध्यक्ष संतोष जंगम आणि माजी नगरसेविका शिवानी जंगम यांनी शेकापक्षासाठी सदैव मेहनत घेणारा तसेच वॉर्ड क्रमांक 14 बौद्धवाडा, सोमेश्वर वसाहत याठिकाणी मोठे प्राबल्य असतानाही माघार घेऊन पक्षाने दिलेले उमेदवार निवडून आणण्यासाठी प्रचंड मेहनत घेणारे सचिन कांबळे (भीमा) यांना स्वीकृत नगरसेवक बनवले आहे.

आपल्या पक्षातील सर्वसामान्य कार्यकर्त्याला मोठे करण्याची भावना उपनगराध्यक्ष संतोष जंगम आणि माजी नगरसेविका शिवानी जंगम यांनी नेहमीच ठेवली असून, सचिन कांबळे (भीम) यांना स्वीकृत नगरसेवकपदी निवड होताच शेतकरी कामगार पक्षाचे तालुका चिटणीस किशोर पाटील, नगराध्यक्षा रोशना मोडवे, उपनगराध्यक्ष संतोष जंगम, माजी नगराध्यक्षा शिवानी जंगम आणि सर्व शेकापक्षाचे नगरसेवक, नगरसेविका उपस्थित होत्या.