श्रेयसने मुंबईत खरेदी केले आलिशान घर

घराची किंमत दोन कोटी 90 लाख रुपये

। मुंबई । वृत्तसंस्था ।

भारतीय क्रिकेटपटू श्रेयस अय्यर आणि त्याची आई रोहिनी अय्यर यांनी मुंबईतील वरळी भागात एक आलिशान अपार्टमेंट खरेदी केले आहे. या अपार्टमेंटची किंमत तब्बल 2.90 कोटी रुपये असल्याचे सांगितले जात आहे. तसेच हे अपार्टमेंट 523 चौरस फूट आकाराचे असून 55 हजार 238 रुपये प्रति चौरस फूट दराने खरेदी केल्याचीही माहिती आहे.

हिंदुस्तान टाइम्सने झॅप्की या वेबसाईटच्या हवाल्याने दिलेल्या वृत्तानुसार, वरळीच्या आदर्श नगर भागातील त्रिवेणी इंडस्ट्रियल सीएचएसएलच्या दुसर्‍या मजल्यावर हे अपार्टमेंट आहे. 19 सप्टेंबर 2024 रोजी या अपार्टमेंटची नोंदणी करण्यात आली आहे. यासाठी श्रेयस अय्यरने 17.40 लाख रुपयांची स्टँप ड्यूटी तसेच 30 हजार रुपये नोंदणी शुल्क भरल्याचे सांगण्यात येत आहे.

खरं तर मालमत्ता खरेदीवरून श्रेयस अय्यर पहिल्यांदाच चर्चेत आला, असं नाही. यापूर्वी 2020 मध्ये श्रेयसने मुंबईतील सर्वात उंच इमारतींपैकी एक असलेल्या लोढा वर्ल्ड टॉवर्समध्येही 380 चौरस फुटांचे अपार्टमेंट खरेदी केले होते. द वर्ल्ड टॉवर्सच्या 48व्या मजल्यावर हे घर खरेदी करण्यात आले होतं. दरम्यान, श्रेयस अय्यर सध्या भारतीय संघाबाहेर आहे. मागील काही कालावधीपासून तो संघात स्थान मिळवण्यासाठी संघर्ष करतो आहे. त्याला बांगलादेशविरुद्धच्या मालिकेसाठी भारतीय संघात स्थान मिळालेले नाही.

काही दिवसांपूर्वी तो दुलीप ट्रॉफीमध्ये खेळताना दिसला होता. या स्पर्धेत त्याने चांगली कामगिरी केली होती. या कामगिरीच्या जोरावर श्रेयस लवकरच भारतीय संघात पुनरागमन करेन, असा विश्‍वास त्याच्या चाहत्यांना आहे.