। पनवेल । वार्ताहर ।
पनवेल महानगरपालिकेच्या तळोजा गावात भटक्या कुत्र्यांच्या वाढत्या दहशतीमुळे रहिवाशांचे हाल सुरूच आहेत. शुक्रवारी (दि. 10) संध्याकाळच्या सुमारास मन्नत आळी परिसरात खेळत असलेल्या तीन वर्षीय बालकावर भटक्या कुत्र्याने भीषण हल्ला केला. ही घटना जवळील सीसीटीव्ही कॅमेऱ्यात कैद झाली असून, परिसरात भीतीचे वातावरण पसरले आहे. जखमी लहान मुलगा खेळत असताना एका भटक्या कुत्र्याने त्याच्यावर झडप घातली. काही क्षणांतच आणखी दोन कुत्रे त्याच्यावर तुटून पडले. या हल्ल्यात बालकाच्या चेहऱ्यावर गंभीर जखमा झाल्या असून, त्याच्या ओठ व नाक या भागांना विशेष इजा पोहोचली. मुलाच्या आरडा ओरडीनंतर घरच्यांनी धाव घेत कुत्र्यांच्या तावडीतून त्याची सुटका केली आणि तातडीने कामोठे येथील महात्मा गांधी मिशन रुग्णालयात दाखल केले. वैद्यकीय अधिकाऱ्यांनी त्यानंतर पुढील उपचारासाठी त्याला मुंबईतील नायर रुग्णालयात हलविण्याचा सल्ला दिला, जिथे सध्या प्लास्टिक सर्जरीसह उपचार सुरू आहेत. या घटनेनंतर तळोजा आणि खारघर परिसरातील नागरिकांमध्ये तीव्र संताप उसळला आहे. वारंवार होत असलेल्या अशा कुत्र्यांच्या हल्ल्यांवर पालिका प्रशासनाने ठोस उपाययोजना न केल्याचा आरोप रहिवाशांनी केला आहे. अनेक तक्रारी दिल्यानंतरही उपाययोजना न झाल्याने नागरिक भयभीत असून, लहान मुलांना घराबाहेर सोडताना पालक घाबरत आहेत.
तळोजा गावात तीन वर्षीय बालकावर भटक्या कुत्र्याचा हल्ला
