माटुंग्यातील इमारतीवरून पडून विद्यार्थिनीचा मृत्यू

| मुंबई | प्रतिनिधी |

माटुंगा येथील बहुमजील इमारतीच्या छतावरून पडून 20 वर्षीय महाविद्यालयीन विद्यार्थिनी झायना सेठिया हिचा मृत्यू झाला. तिने नैराश्यातून इमारतीच्या छतावरून उडी मारून आत्महत्या केल्याचा संशय आहे. ती आपल्या कुटुंबासह ‘टेक्नो हाइट्स’ या 14 मजली इमारतीमधील आठव्या मजल्यावर राहत होती. गेल्या काही दिवसांपासून ती नैराश्यात होती. याप्रकरणा माटुंगा पोलिसांनी अपमृत्यूची नोंद केली असून, याप्रकरणी पुढील तपास सुरू आहे.

मिळालेल्या माहितीनुसार, मृत मुलगी दक्षिण मुंबईतील प्रसिद्ध महाविद्यालायात शिक्षण घेत होती. गेल्या काही दिवसांपासून झायना नैराश्यात होती. झायनाच्या दोन मित्र-मैत्रिणी मंगळवारी (दि.01) रात्री तिच्या घरी आले होते. तिने त्यांना इमारतीच्या छतावर नेले. तेथे त्यांनी तिला समजावण्याचा प्रयत्न केला. मात्र, अचानक आणि अनपेक्षितपणे झानाने छतावरून उडी मारली. त्यामुळे तिचे मित्र-मैत्रिण प्रचंड तणावाखाली आहेत. इमारतीच्या छतावरून उडी मारल्यानंतर झायना शेजारील इमारतीच्या खिडकीवर आपटली आणि अंदाजे 15 फूट अंतरावरील संरक्षक भिंतीवर कोसळली. तिचा घटनास्थळीच मृत्यू झाला. ती गंभीर जखमी झाली होती. तिला शीव येथील लोकमान्य टिळक रुग्णालयात नेण्यात आले. तेथील डॉक्टरांनी तिला मृत घोषित केले. घटनेची माहिती मिळताच माटुंगा पोलिसांनी घटनास्थळी धाव घेतली. या प्रकरणी अपमृत्यूची नोंद करण्यात आली आहे. मुलगी गेल्या काही दिवसांपासून नैराश्यात होती. त्यामुळे तिने आत्महत्या केल्याचे वरिष्ठ पोलीस निरीक्षक राजेंद्र पवार यांनी सांगितले. याप्रकरणी माटुंगा पोलिसांनी तिच्या दोन्ही मित्र-मैत्रिणीला चौकशीसाठी ताब्यात घेतले आहे, मात्र त्यांनाही मोठ्या मानसिक धक्का बसला असून ते व्यवस्थित माहिती देत नसल्याचे पोलिसांनी सांगितले. या घटनेमागील नेमके कारण शोधण्यासाठी पुढील तपास सुरू आहे.