आवडीतून निर्माण केला रोजगार
। प्रतिक कोळी । रेवदंडा ।
दिवाळी म्हणजे नवचैतन्याचा, तिमिराकडून तेजाकडे अशा प्रवासाचे प्रतिनिधीत्व करणारा भारतीय परंपरेतील सर्वात मोठा सण. अर्थातच या सणाची आठवण जरी निघाली, तरी रांगोळी, दिव्यांची आरास, कंदील, फटाके आणि मिठाई यांच्याशिवाय या सणाला पूर्णत्वच प्राप्त होत नाही. पण, जर फटाक्यांना चॉकलेट्सचा गोडवा आला तर..? काय म्हणता? चॉकलेट्सला फटाक्यांचा गोडवा? कसे शक्य आहे? अशा अनेक संभ्रमित प्रतिक्रिया एकाच वेळी उमटतील. पण, अलिबाग तालुक्यातील एका युवतीने फटाक्यांच्या विविध स्वरुपात चॉकलेट्सची निर्मिती केली आहे. त्यांना मोठी मागणी असून, त्यातून तिला रोजगाराचे साधन निर्माण झाले आहे.
अलिबागमधील 21 वर्षांच्या आसावरी वर्तक हिने पाककलेचा जोपासलेला छंद आज तिची ओळख बनली आहे. आसावरी हिने दिवाळीमधील पारंपरिक गोड अशा मिठाईला बगल देत आधुनिकतेकडे वळत चॉकलेट आणि ड्रायफ्रूटपासून फटाक्यांच्या आकाराचे चॉकलेट्स बनवित घरबसल्या व्यवसाय सुरू केला आहे. पाककलेच्या या आवडीतून तिला रोजगार निर्मिती होऊन आर्थिक स्वावलंबन घडले. सध्या ती वाणिज्य शाखेतून पदव्युत्तर शिक्षण घेत आहे. आपल्या शैक्षणिक जीवनापासूनच तिने पाककला आणि मायक्रोमपासून विविध वस्तूंची निर्मिती यांची आवड जोपासली आहे. पाककलेमध्ये विशेषतः चॉकलेटपासून विविध पदार्थ बनविण्याची आवड असणार्या आसावरीने पदार्थांमध्ये काहीतरी नाविण्य आणण्याचा प्रयत्न करीत असताना, यावर्षी दिवाळीच्या निमित्ताने फटाक्यांच्या आकाराचे चॉकलेट्स बनवले आहेत. हे चॉकलेट्स विक्रीसाठी उपलब्ध असून, गंमत म्हणजे फटाक्यांच्या आकाराचे असणारे हे चॉकलेट्स फटाक्यांसारखीच पॅकिंग करून एका छोट्या आकाराच्या बॉक्समध्ये दिले जात आहेत. दिवाळीमध्ये वापरण्यात येणारे लक्ष्मीबार, सुतळी बॉम्ब, रॉकेट, पाऊस, भुईचक्र, फटक्यांची लड अशा स्वरूपातील एकूण 14 वेगवेगळ्या फटाक्यांच्या आकारांच्या चॉकलेट्सचा हा 1 बॉक्स 250 ग्रॅम इतक्या वजनाचा आहे. सर्वच खवय्ये, विशेषतः चॉकलेटप्रेमी यांच्यासाठी सध्या या बॉक्सची किंमत फक्त आणि फक्त 199 रुपये इतकीच आहे.
कुटुंबाला हातभार
यासोबतच ती मायक्रोमपासून विविध कलाकुसरीच्या वस्तू, घरगुती सजावटीच्या वस्तू, भेटवस्तू, लग्नसोहळ्यातील रुखवत बनवित असून, सोशल मीडियाच्या माध्यमातून विक्रीही करते. या कंदिलांना स्थानिक भागासोबतच जिल्ह्याबाहेरही मागणी असल्याचे त्यांनी सांगितले आहे. अर्थात, तिला तिच्या आवडीतून रोजगारनिर्मिती होऊन, कुटुंबालासुद्धा आर्थिक हातभार लागत आहे. संबंधित चॉकलेट्सच्या आणि वस्तुंच्या खरेदीसाठी 9028144104 या क्रमांकावर संपर्क साधावा.
आधुनिक जगात प्रत्येक स्त्रीने आर्थिकदृष्ट्या स्वावलंबी होणे आवश्यक आहे. महिला सबलीकरणासाठी स्वावलंबन हाच मुख्य पाया आहे. आणि, याच दृष्टीने मी प्रयत्नशील असून, सर्व भगिनींना येत्या दिवाळीच्या शुभेच्छांसह आर्थिक स्वावलंबन स्वीकारण्याची गरज आहे.
आसावरी वर्तक, वरसोली-अलिबाग