कृषीवलच्या दणक्याने प्रशासन ताळ्यावर

हावरे ग्रुपच्या अतिक्रमणाचा केला पंचनामा

| पेण | प्रतिनिधी |

मे. हावरे ग्रुपने पेण नगरपालिकेकडून कोणत्याही प्रकारचा बांधकाम परवाना न घेता म्हाडाच्या जागेत बेकायदेशीर बांधकाम करुन स्थानिक शेतकर्‍यांचे जाण्या-येण्याचे मार्ग अडविल्याबाबतचे वृत्त कृषीवलने दि. 28 जानेवारी रोजी प्रकाशित केले होते. परंतु, निद्रावस्थेत असणार्‍या प्रशासनाने आठवड्यानंतर घटनास्थळी जाऊन पंचनाम्याचा सोपस्कार पूर्ण केला. हावरे गु्रपने मनामनी करून सरकारी जागेवर अतिक्रमण करीत मूळच्या शेतकर्‍यांचे रस्तेसुद्धा बंद केल्याचे दिसत असतानाही पंचनामा करण्यास इतका वेळ का लागला, यावर उलट-सुलट चर्चांना उधाण आले आहे. परंतु, कृषीवलच्या दणक्याने प्रशासन ताळ्यावर आल्याने शेतकर्‍यांनी समाधान व्यक्त केले.

याबाबत हकीकत अशी की, पेण नगरपालिकेच्या कार्यक्षेत्रात मे. हावरे ग्रँड यांच्यातर्फे अनिल कुमार सिंघ व उज्ज्वला सतिश हावरे यांच्या नावे सर्वे नं. 256अ/1, 256अ/2 हे सातबारे आहेत. त्याच्याच शेजारी असलेल्या 256अ/3 हा महाराष्ट्र शासनातर्फे महाराष्ट्र गृहनिर्माण मंडळ क्षेत्र विकास या नावाने म्हाडाचा सातबारा आहे. हावरे गु्रपने स्वतःची जागा सोडून महाराष्ट्र गृहनिर्माण मंडळ क्षेत्राच्या जागेवर बेकायदेशीरपणे बांधकाम केले आहे. पेण नगरपालिकेतून कोणत्याही प्रकारचा बांधकाम परवाना घेतलेला नाही. स्वतःच्या मर्जीने म्हाडाच्या जागेत बिनधास्तपणे बांधकाम केले आहे. तसेच लगतच्या शेतकर्‍यांचेदेखील ये-जा करण्याचे मार्ग अडविले आहे. याबाबत कृषीवलने वृत्त प्रसिद्ध केल्यानंतर तहसीलदार तानाजी शेजाळ यांनी तातडीने पेण मंडळ अधिकारी सुजाता जाधव व पेण तलाठी अनिकेत पाटील यांना घटनास्थळी पंचनामा करण्यास पाठविले. मात्र, पंचनामाच्या वेळेला हावरे गु्रपकडून कुणीही हजर राहिले नाही. तसेच जे देखरेख करणारे कर्मचारी होते, त्यांनी स्वतःचे मोबाईल बंद करून ठेवले होते. शेतकरी अमित पाटील घटनास्थळी आपल्या कागदपत्रांसह हजर होते, तर प्रसार माध्यमांचे प्रतिनिधीदेखील घटनास्थळी हजर होते.

हावरे ग्रुपकडून अतिक्रमण
यावेळी मंडळाधिकारी सुजाता जाधव यांनी सदरील जागेचा पंचनामा केला. प्रथमदर्शनी अतिक्रमण झाले असल्याचे दिसत आहे, असेही त्यांनी सांगितले. तसेच राष्ट्रीय महामार्गाची जागादेखील हावरे गु्रपने पत्रे मारून आतमध्ये घेतली असल्याचे सांगितले. एकंदरी काय तर, हावरे गु्रप मनामनी करून सरकारी जागेवर अतिक्रमण करत असून, मूळच्या शेतकर्‍यांचे रस्तेसुद्धा बंद करत असल्याचे दिसत आहे.

राष्ट्रीय महामार्ग, हावरे गु्रप, नगरपालिका, म्हाडा यांची संयुक्तरित्या बैठक प्रांत कार्यालयात ठेवणार असून, नव्याने जागेची सीमा निश्‍चित करून घेण्यात येईल. आमच्या कर्मचार्‍यांनी पंचनामा केला आहे. पंचनाम्यानुसार घटनास्थळी काही गोष्टी संशयास्पद आहेत. मात्र, याबाबत लवकरात लवकर संयुक्त बैठक लावली जाईल.

तानाजी शेजाळ,
तहसीलदार