अवकाळीने वीटभट्टी व्यवसाय उद्धवस्थ
| पाली/बेणसे | प्रतिनिधी |
अवकाळी पावसामुळे पाली सुधागड़, माणगाव, रोहा, महाड़, पोलादपुर, खालापुर, कर्जत, अलिबाग, पेण, मुरुड सह जिल्ह्यातील वीटभट्टी व्यवसाय संकटात सापडला आहे. त्यांना तातडीने आर्थिक मदत करण्याची आवश्यकता निर्माण झाली आहे. सरकारकडे यासाठी मागणी करण्यात येणार आहे.
आतापर्यंत तीन ते चार वेळा अवकाळी पावसाने जिल्ह्याला झोडपून काढले. यामध्ये आंबा, काजू तसेच ऐन रब्बी हंगामातील पिकांचे मोठे नुकसान झाले. नुकसानग्रस्त शेतकर्‍यांना नुकसानभरपाई देण्याच्या दृष्टीने पंचनामे करून शासन स्थरावर योग्य ती कार्यवाही केली जात आहे, ही बाब स्वागतार्ह आहे, मात्र याचवेळी या अवकाळी पावसाच्या कचाट्यात वीटभट्टी व्यवसायिक पूर्णपणे आर्थिक संकटात सापडला आहे. सध्या सलग तीन दिवस जिल्ह्यात मुसळधार पाऊस पडला आहे. त्यामुळे ऐन हंगामात वीटभट्टी चालक व मालकांना नुकसानीला सामोरे जावे लागले.
रायगडात पडलेल्या अवकाळी पावसाने उध्वस्त झालेल्या वीटभट्टी व्यवसायिकांना स्थिरस्थावर होऊन पुन्हा व्यवसायिक उभारी घेण्यासाठी शासनाने अर्थसहाय्यासह वीटभट्टी विमा उतरवावा.
प्रकाश देसाई, शिवसेना नेते
सध्या ठिकठिकाणी लहान-मोठया वीटभट्ट्या सुरू झाल्या आहेत. जिल्ह्यात कित्येक कोटींची उलाढाल या उद्योगात होते. सध्या सर्वत्रच मोठ्या प्रमाणात विटभट्ट्या सुरू झाल्या आहेत. घरे बांधणीसाठी विटांची मागणी देखील आहे. मात्र अवकाळी पावसामुळे असंख्य कच्च्या विटा खराब झाल्या आहेत. विटा पाडण्यासाठी जमा करून ठेवलेली माती देखील पावसामुळे वाहून गेली व भिजली. विटा भाजण्यासाठी लागणारा भाताचा कोंडा, कोळसा किंवा तूस देखील पावसामुळे भिजल्याने वीटभट्टी लावणे म्हणजेच पक्क्या विटा पडणे देखील मुश्किल झाले आहे. निसर्गाच्या लहरीपणामुळे अशा विविध मार्गाने वीटभट्टी चालक व मालकांचे लाखो रुपयांचे नुकसान झाले आहे. मागील वर्षी लॉकडाऊन, आता कडक निर्बंध आणि अवकाळी पाऊस यामुळे वीटभट्टी मालकांना व चालकांना नुकसानीला सामोरे जावे लागले आहे. शासनाकडून शेतीसाठी थोडीबहुत नुकसान भरपाई मिळते मात्र वीटभट्टी चालक व मालकांसाठी तशी कोणतीच तरतूद नाही. परिणामी आलेल्या परिस्थितीवर मात करत तग धरण्याशिवाय त्यांना गत्यंतर नाही. या प्रश्‍नी आपण शिवसेनेचे शिष्टमंडळ घेऊन राज्याचे मुख्यमंत्री एकनाथ शिंदे यांची भेट घेऊन मागणी करणार आहोत. मुख्यमंत्री महोदय या मागणीचा सकारात्मक विचार नक्की करतील, असे देसाई यांनी आत्मविश्‍वास पूर्वक सांगितले.
