नवेदर बेली पुलाची अवस्था बिकट
प्रवेश बंदी असतानाही अवजड वाहनांची वाहतूक
| रायगड | जिल्हा प्रतिनिधी |
अलिबाग-रेवदंडा मार्गावरील नवेदर बेली येथील पुलाची अवस्था बिकट झाली आहे. हा पुल अखेरची घटका मोजत आहे. त्यामुळे या पुलावरून अवजड वाहनांच्या वाहतुकीवर तात्काळ बंदी घालणारा आदेश जिल्हाधिकारी किशन जावळे यांनी ऑगस्ट महिन्यात जारी केला होता. मात्र, आजही त्या पुलावरून अवजड वाहनांची वाहतूक सुरुच आहे. त्यामुळे या पुलाच्या दुरुस्तीकडे सार्वजनिक बांधकाम विभागाकडून दुर्लक्ष केले जात असल्याचा आरोप प्रवासी वर्गातून होत आहे.
विजना कन्सलटींग इंजिनिअरींग प्रा. लि. या संस्थेमार्फत अलिबाग-रोहा, अलिबाग-रेवदंडा, पोयनाड-उसर-भादाणे व भाकरवड-देहेन या मार्गांवरील एकूण 8 पुलांचे स्ट्रक्चरल ऑडीट करण्यात आले होते. त्यामध्ये नवेदर बेली पुलाचादेखील समावेश आहे. हे पूल संरचनात्मकदृष्ट्या धोकादायक स्थितीत असल्याचे निदर्शनास आल्यानंतर जिल्हाधिकारी यांनी संबंधित पुलांवरून अवजड वाहनांच्या वाहतुकीवर तात्काळ बंदी घालणारा आदेश ऑगस्ट महिन्यात जारी केला होता. त्यान नवेदर बेली पूल अधिक असुरक्षित झाल्याने वाहनचालकांनी व ट्रान्सपोर्ट संस्थांनी प्रशासनाच्या आदेशाचे काटेकोर पालन करावे. अपघात टाळण्यासाठी व जनतेच्या सुरक्षेच्या दृष्टीने ही कार्यवाही करण्यात आली असल्याचे लेखी आदेश काढण्यात आले आहेत. पुढील आदेश मिळेपर्यंत बंदी लागू राहणार असून, नियमभंग करणाऱ्यांविरोधात कडक कारवाई करण्यात येईल, असे जिल्हाधिकारी किशन जावळे यांनी कळिवले होते. मात्र, बंदीचे आदेश झुगारून अलिबाग-रेवदंडा मार्गावरील नवेदर बेली येथील पुलावरून अनेक अवजड वाहने धावताना दिसत आहेत. त्यामुळे प्रवाशांच्या सुरक्षेचा प्रश्न निर्माण झाला आहे. जिल्हाधिकाऱ्यांच्या आदेशाकडे दुर्लक्ष करून होत असलेल्या खासगी अवजड वाहनांना रोखणार कधी, असा प्रश्न नागरिकांकडून केला जात आहे.
बांधकाम विभागाकडून बघ्याची भूमिका
नवेदर बेली जवळील पुल अखेरची घटका मोजत आहे. या पुलाचा खालील भाग खचला असून सिमेंट निघालेले आहे. अनेक भागांना तडे गेले आहेत. पुलाच्या लोखंडी सळई देखील बाहेर निघाल्या आहेत. त्यांना गंज लागलेला आहे. त्यामुळे हा पुल अखेरची घटका मोजत असल्याचे चित्र आहे. या पुलाच्या दुरुस्तीकडे अद्यापपर्यंत सार्वजनिक बांधकाम विभागाकडून लक्ष देण्यात आले नाही. पाऊस संपून अनेक दिवस उलटून गेले आहेत. मात्र, सार्वजनिक बांधकाम विभागाकडून या पुलाबाबत बघ्याची भूमिकाच घेतली जात आहे.
धोकादायक पुलांची नव्याने उभारणी करण्यात येणार आहे. या कामाची निविदा काढण्यात आली असून लवकर त्याचे काम सुरू करण्यात येईल. याबाब अधिक माहिती उपअभियंता यांच्याकडे आहे.
मोनिका धायतडक,
कार्यकारी अभियंता, सार्वजनिक बांधकाम विभाग
Leave a Reply
On 7th June 1937, Krushival was started as a weekly magazine and the masses got their platform. In the Raigad district, many new movements were launched to fight against injustice and exploitation upon the underprivileged and the hard-working common people.