बेलकडेमध्ये रंगणार शनिवारी कबड्डीचा थरार

| अलिबाग | प्रतिनिधी |

ग्रामस्थ मंडळ, व धावीर क्रीडा मंडळ बेलकडे आयोजित रायगड जिल्हा कबड्डी असोसिएशनच्या मान्यतेने शेतकरी कामगार पक्ष पुरस्कृत कबड्डी स्पर्धा होणार आहे. शनिवार (दि.17) सायंकाळी सहा वाजल्यापासून कबड्डीचा थरार पहाता येणार आहे. स्व. प्रभाकर पाटील क्रीडा संकुलामध्ये होणाऱ्या या स्पर्धेचे उद्घाटन शेकाप सरचिटणीस आ. जयंत पाटील यांच्या हस्ते होणार आहे.

यावेळी माजी आ. पंडित पाटील, जिल्हा परिषद माजी अध्यक्ष ॲड. आस्वाद पाटील, शेकाप महिला आघाडी प्रमुख चित्रलेखा पाटील, शेकाप तालुका चिटणीस अनिल पाटील, रायगड बाजारचे चेअरमन नृपाल पाटील, जिल्हा परिषद माजी सदस्य द्वारकानाथ नाईक, माजी नगराध्यक्ष प्रशांत नाईक, संजय पाटील, माजी उपनगराध्यक्षा ॲड. मानसी म्हात्रे, आवासचे माजी सरपंच अभिजीत राणे, वेश्वीचे माजी सरपंच प्रफुल्ल पाटील, शेकाप युवा नेते सवाई पाटील, अलिबाग पंचायत समितीचे माजी सदस्य सुरेश पाटील आदी मान्यवर उपस्थित राहणार आहेत.

या स्पर्धेत एकूण 48 संघ सहभागी होणार आहेत. प्रथम क्रमांकाला रोख 21 हजार रुपये व चषक, द्वीतीय क्रमांकाला रोख 15 हजार रुपये व चषक, तृतीय व चतुर्थ क्रमांकाला प्रत्येकी रोख दहा हजार रुपये व चषक देऊन गौरविण्यात येणार आहे. तसेच उत्कृष्ट खेळाडू, उत्कृष्ट चढाई, पब्लिक हिरो आदी खेळाडूंना आकर्षक चषक देऊन सन्मानित केले जाणार असल्याची माहिती आयोजकांनी दिली.