| वाशिम | वृत्तसंस्था |
वाशिमच्या कारंजा तालुक्यातील कारंजा ते पोहा मार्गावरील तुळजापूर धरणाजवळ पिकअप, प्रवासी ऑटो रिक्षा आणि अन्य एक ऑटो जोरदार धडक होऊन या अपघातामध्ये तीन जणांचा जागीच मृत्यू झाला, तर 12 जण गंभीर जखमी झाले आहेत.
कारंजा-पोहा मार्गावर भरधाव वेगात येणाऱ्या पिकअप वाहनाने विरुद्ध दिशेने जाणाऱ्या ऑटोला धडक दिली. ही ऑटो रिक्षा प्रवाशांनी खचाखच भरली होती. धडक एवढी जोरदार होती, की रिक्षात बसलेले सर्व प्रवासी गंभीर जखमी आहेत. याच रिक्षाच्या मागून दुसरा मालवाहक ऑटो देखील येत होता. या वाहनाची देखील पिकअपला धडक बसली. तीन वाहनांच्या झालेल्या या अपघातात तीन जणांचा जागीच मृत्यू झाला. अपघाताची तीव्रता पाहून स्थानिकांनी घटनास्थळाकडे धाव घेऊन जखमी प्रवाशांना तातडीने कारंजा ग्रामीण रुग्णालयात उपचारासाठी दाखल केले. घटनास्थळी पोलिसांनी पंचनामा केला असून अधिकचा तपास कारंजा ग्रामीण पोलीस करीत आहेत.