पेब किल्ल्यावर पर्यटकाचा पाय दगडाखाली अडकला

। नेरळ । प्रतिनिधी ।

नेरळ जवळील पेब किल्ल्यावर वर्षासहल आणि ट्रेकिंगसाठी गेलेल्या तरुणाचा पाय डोंगर उतरत असताना दगडाखाली अडकला. त्यावेळी स्थानिकांनी आटोकाट प्रयत्न केल्यानंतर पोलिसांची मदत घेण्यात आली आणि त्यानंतर दगडामध्ये अडकलेला पाय सुरक्षित काढण्यात आला.

कर्जत तालुक्यात अनेक पर्यटक पावसाचा आनंद घेण्यासाठी व ट्रेकिंग करण्यासाठी येत असतात. शनिवार- रविवार असल्याने पर्यटक मौज मजा करण्यासाठी धबधबे , ट्रेकिंग करण्यासाठी किल्ले याकडे येत असतात.

पेब किल्ला आनंदवाडी येथे पर्यटक मोठ्या प्रमाणात आले होते. पेब किल्ल्याची ट्रेकिंग करून परतत असताना एका पर्यटकांचा पाय दगडाखाली अडकला. त्यानंतर त्या तरुणांच्या ग्रुपने त्या ट्रेकर्सचा पाय दगडाच्या खालून काढण्याचा प्रयत्न केले. त्यावेळी स्थानिक आनंदवाडी येथील तरुणांनी त्या ट्रेकर्सचा पाय दगडाखालून काढण्याचा प्रयत्न केला. नेरळ पोलीस ठाण्याचे अधिकारी राहुल वरोटे यांना संपर्क केला असता त्यांनी तात्काळ पोलीस शिपाई कणके आणि पोलीस शिपाई महाकाल यांना पर्यटकांच्या मदतीसाठी पाठवण्यात आले. पोलीस शिपाई कणके आणि महाकाल यांनी स्थानिक ग्रामस्थांच्या मदतीने दगडाखाली पाय अडकलेल्या पर्यटकाला वाचवण्यात आले.

दगडाखाली पाय अडकलेल्या पर्यटकाचे नाव रोहन जीनोरस कदम वय वर्ष 25 राहणार ठाणे येथील असून, त्याला वाचवण्यात नेरळ पोलिसांना यश आले आहे. पर्यटकाने पोलीस शिपाई कणके व महाकाल यांचे कौतुक केले. त्या ठिकाणच्या तरुणांनी आनंदवादी येथून जात तेथे दगड बाजूला काढण्याचा प्रयत्न केला, मात्र काहीही फायदा होत नव्हता. शेवटी दगड बाजूला करण्यासाठी लोखंडी पहार यांच्या मदतीने ही मोहीम स्थानिकांनी पोलिसांच्या मदतीने फत्ते केली.