आता पर्यटकांचा प्रवास होणार सुखकर; जड-अवजड वाहनांना बंदी

कोंडीबरोबरच अपघात रोखण्यासाठी अधिसूचना जारी

। अलिबाग । प्रतिनिधी ।

सरत्या वर्षाला निरोप देण्यासाठी आणि नवीन वर्षांचं स्वागत करण्यासाठी 25 डिसेंबर ख्रिसमसपासूनच अनेक लोकं सुट्टीवर गेले आहेत. या दिवसांमध्ये शाळांना देखील सुट्टी असते. अशावेळी अनेक कुटुंब बाहेर जाण्याचा प्लान करतात. फॅमिली पिकनिक म्हणून अलिबाग हे सर्वाचं आवडीचं ठिकाण आहे. त्यामुळे पर्यटकांना वाहतूक कोंडीचा त्रास होऊ नये, याकरीता अलिबाग व मुरूड तालुक्यात 28 आणि 29 डिसेंबर रोजी अवजड वाहनांना बंदी घालण्यात आली आहे. पर्यटकांची वाढती संख्या लक्षात घेता वाहतूक कोंडी टाळण्यासाठी प्रशासनानं हा निर्णय घेतला आहे. त्यामुळे अलिबागमध्ये सुट्टीसाठी जाणार्‍या जड-अवजड वाहनांना बंदीआता सुखाचा होणार आहे.

अनेकदा जड वाहने रस्त्यांवर असल्यामुळे जास्त ट्रॅफिक जॅमची शक्यता असते. तसेच या वाहनांमुळे अपघात होण्याचीदेखील दाट शक्यता असते. या सगळ्याचा विचार करता हा निर्णय घेण्यात आला आहे.

थर्टी फर्स्टी साजरा करण्यासाठी रायगड जिल्ह्यात लाखोच्या संख्येने पर्यटक येणार आहेत. पर्यटकांचा प्रवास सुखकर व आरामदायी व्हावा यासाठी जिल्हा प्रशासनाने दोन दिवस अवजड वाहनांना बंदी घातली आहे. शनिवारी (दि.28) सकाळी सहा ते रविवारी (दि.29) रात्री बारा वाजेपर्यंत ही बंदी राहणार असल्याची माहिती जिल्हाधिकारी कार्यालयाकडून देण्यात आली आहे.

थर्टी फर्स्टनिमित्त 28 व 29 डिसेंबर 2024 रोजी शनिवार व रविवार रोजी सार्वजनिक सुट्टी आहे. पर्यटक मोठ्या प्रमाणात येणार आहेत. वाहतूक कोंडीमुळे पर्यटक व नागरीकांना मानसिक त्रास सहन करावा लागू नये. अपघात रोखण्याच्या दुष्टीकोनातून उपाययोजना म्हणून तसेच पर्यटक व नागरीकांचा प्रवास सुखरूप व्हावा यासाठी शनिवारी (दि.28) सकाळी सहा ते रविवार (दि.29) मध्यरात्री बारा वाजेपर्यंत राष्ट्रीय महामार्ग क्रमांक 166-अ वर धरमतर पूल ते अलिबाग तसेच अलिबाग ते मांडवा बंदर व अलिबाग-रेवदंडा-मुरूड या राज्यमार्गावरील जीवनावश्यक वस्तू वगळून जड-अवजड वाहनांकरिता जिल्हाधिकारी किशन जावळे यांनी वाहतूक बंदी अधिसूचना जारी केली आहे.

समुद्रकिनारे हाऊसफुल्ल
रायगड जिल्हा हा पर्यटन जिल्हा आहे. 2024 या वर्षाला निरोप व 2025 या नवीन वर्षाच्या स्वागतासाठी मांडवा, किहीम, अलिबाग, आक्षी, नागाव, रेवदंडा, काशिद, मुरूड, दिवेआगर, श्रीवर्धन, महाड या पर्यटनस्थळी मोठ्या प्रमाणात येणार आहेत. काही पर्यटक निघाले असून काही पर्यटक जिल्ह्यात दाखल झाले आहेत. राष्ट्रीय महामार्ग, राज्य महामार्ग तसेच शहरामध्ये पर्यटकांची मोठ्या प्रमाणात वर्दळ असून महामार्गावरील जड-अवजड वाहनांमुळे वाहतूक कोंडी होत आहे.

या मार्गावर कोंडीची शक्यता
वडखळ-अलिबाग हा रस्ता एकेरी रस्ता आहे. अलिबाग-रेवस व अलिबाग-रेवदंडा-मुरूड हे रस्ते अरूंद आहेत. पर्यटकांची प्रचंड प्रमाणात येणारी व जाणारी वाहने व त्याच वेळी रोडवरून होणारी डंपर, ट्रक व इतर जड-अवजड वाहनांची वाहतूक कोंडी होण्याची तसेच अपघात होण्याची दाट शक्यता आहे.