अवकाळी पावसामुळे आंबा पिकावर परिणाम

बागेची पाहणी करून उपाययोजना करावी- कृषी अधिकारी कांबळे

। तळा । प्रतिनिधी ।

सद्यस्थितीमध्ये कोकण विभागामध्ये ढगाळ वातावरण दिसून येत आहे. त्यामुळे अवकाळी पावसाची शक्यता वर्तविली जात आहे. अशाप्रकारचे वातावरण हे किड व रोग प्रादुर्भावासाठी अनुकूल आहे. तरी अशा परिस्थितीमध्ये आंबा पिकावर फुलकिडी व फळमाशी या किडींचा आणि करपा रोगाचा प्रादुर्भाव होण्याची शक्यता आहे. तसेच, काजू पिकावर देखील ढेकण्या आणि फुलकिडींचा प्रादुर्भाव वाढण्याची शक्यता वर्तविली जात आहे. तरी आंबा व काजू बागायतदारांनी आपल्या बागेची नियमितपणे पाहणी करून किड व रोगनिहाय उपाययोजना करावी, असे आवाहन तळा कृषी अधिकारी आनंद कांबळे यांनी केले आहे.

काजूवरील ढेकण्या आणि बोंडू व बी पोखरणार्‍या अळीच्या व्यवस्थानासाठी लॅम्बडा सायहॅलोथ्रीन 5 टक्के प्रवाही 6 मि.ली. किंवा प्रोफेनोफॉस 50 टक्के प्रवाही 10 मि.ली. यापैकी एका किटकनाशकाची तसेच काजूवरील फुलकिडीचा प्रादुर्भाव आढळून आल्यास अ‍ॅसिटामिप्रीड 20 टक्के प्रवाही 5 ग्रॅम प्रति 10 लि. पाण्यातून फवारणी करावी, त्याचबरोबर आंब्यावरील फुलकिडींनी आर्थिक नुकसानीची पातळी (10 फुलकिडी प्रति मोहोर किंवा फळांवर 1 स्केल म्हणजेच 1 ते 25 टक्केपर्यंत भाग प्रादुर्भावीत आढळल्यास) व्यवस्थापनाकरीता थायोमेथॉक्झाम 25 टक्के 2 ग्रॅम किंवा स्पिनोसॅड 45 टक्के प्रवाही 2.5 मिली प्रति 10 लीटर पाणी या प्रमाणात फवारणी करावी. तसेच, करपा रोगासाठी कार्बेन्डॅझीम 12 टक्के मॅन्कोझेब 63 टक्के या संयुक्त बुरशीनाशकाची 10 ग्रॅम प्रति 10 लिटर पाण्यातून फवारणी करावी. अवकाळी पाऊस झाल्यास फळमाशीचा प्रादुर्भाव मोठ्या प्रमाणात वाढू शकतो. त्याकरीता विद्यापीठाने विकसित केलेले रक्षक सापळे (मिथिल युजेनॉल ल्युअर्ससह) प्रति हेक्टर 4 याप्रमाणात बागेमध्ये लावून फळमाशीचा प्रादुर्भाव नियंत्रणात आणावा, असे आवाहन देखील कृषी अधिकारी कांबळे यांनी केले आहे.