उरण परप्रांतीय भंगारमाफियांच्या विळख्यात

ओएनजीसीच्या पाईपलाईनवर थाटली दुकाने
नगरपालिका व ओएनजीसीचे दुर्लक्ष
। उरण । वार्ताहर ।
उरण शहर परप्रांतीय भंगार माफियांच्या विळख्यात सापडली आहे. शहरातील जनता सोयीसुविधा पासून वंचीत असताना मात्र या भंगार माफियांना पाणी, वीज सुविधा पुरविल्या जात आहेत. विशेष म्हणजे या भंगार माफियांनी बोरी नाका येथील स्मशानभूमीच्या लगत असलेल्या जागेवर कब्जा केलेला आहे. त्या ठिकाणावरून ओएनजीसी गॅस पाईपलाईन गेलेली असतानाही त्यावर कोणतेही बांधकाम करण्यास सक्त मनाई असताना भंगारची दुकाने खुलेआम वसली आहेत.
येथील जनतेला नोकरीसाठी पोलीस तपासणी सक्तीची असताना पर राज्यातून या ठिकाणी वास्तव्य करणारी व्यक्ती यांची कोणतीही नोंदणी अथवा पोलीस तपासणी केलेली दिसत नाही. अशा व्यक्तीकडूनच घातपात घडवला जाऊ शकतो.
प्रदूषण नियमांना फासण्यात येणारी हरताळ सुरु असून सामाजिक आरोग्य आजही धोक्यात असल्याचे दिसत आहे. यासोबतच लगतच नागरी वस्ती असतानाही राजरोसपणा या भंगारवाल्यांचे कडून कारखान्यातील जमा केलेले साहित्य गॅस कटरने कापण्याचे काम करण्यात येते. या ठिकाणाहून ओएनजीसी गॅस पाईपलाईन गेलेली आहे. त्यामुळे ओएनजीसीचा या ठिकाणी कोणताही व्यवसाय अथवा बांधकाम करण्यास सक्त मनाई हुकूम असतानाही याची खुलेआम पायमल्ली करून भंगर माफियांचा विळखा पडला आहे.
महाराष्ट्र प्रदूषण नियंत्रण मंडळाच्या पर्यावरण सुरक्षा नियमांचे अंतर्गत नागरी वस्ती मध्ये कोणताही कचरा व अन्य वस्तू जाळु नये असे नियम आहेत. जर या नियमांचे कोणी उल्लंघन केल्यास त्यावर कारवाई करण्याचा अधिकारी स्थानिक स्वराज्य संस्थेला देण्यात आला आहे.असे असतानाही हे सर्व भंगार व्यावसायिक राजरोसपणे हे सर्व विषारी पदार्थ जाळून प्रदूषण करत आहेत. मात्र आजपर्यंत त्यांच्यावर कोणत्याही कारवाई होताना दिसत नाही.
आता या प्रदुषणकारी व सामाजिक स्वास्थ्य बिघडवणार्‍या भंगार व्यवसायिकांवर उरण नगरपालिका व ओएनजीसी प्रशासन कधी कारवाई करते याकडे येथील सर्व स्थानिक नागरिकांचे लक्ष लागले आहे. याची माहिती घेऊन आपण योग्य ती कारवाई करू असे उरण नगरपालिकेचे मुख्याधिकारी संतोष माळी यांनी सांगितले.