तळोजा विस्तारित एमआयडीसीला ग्रामस्थांचा विरोध

173 हेक्टर भूसंपादनाला हरकती; शेतकऱ्यांना विश्वासात घेण्याची मागणी

| पनवेल | विशेष प्रतिनिधी |

तळोजा येथील औद्योगिक वसाहतीचा विस्तार करण्याच्या प्रस्तावाला महोदर, चिंचवली आणि चिंध्रण गावांतील ग्रामस्थांनी विरोध दर्शविला आहे. विस्तारित एमआयडीसीच्या दुसऱ्या टप्प्यासाठी 173 हेक्टर जमिनीच्या भूसंपादनाची प्रक्रिया सुरू झाली असतानाच ग्रामस्थांनी शेतजमिनी, गावठाण तसेच स्थानिकांच्या भवितव्याचा प्रश्न उपस्थित केला आहे. यासंदर्भात ग्रामस्थांची प्रांताधिकारी पवन चांडक यांच्यासोबत बैठक झाली. या बैठकीला महोदर, चिंचवली तसेच चिंध्रण गावांतील ग्रामस्थ उपस्थित होते. दरम्यान, विस्तारित एमआयडीसीसाठी प्रस्तावित क्षेत्राबाबत ग्रामस्थांनी विविध मागण्या आणि लेखी हरकती प्रशासनासमोर मांडल्या.

पनवेल तालुक्यातील विविध गावांमध्ये यापूर्वी औद्योगिक प्रकल्प आणि रस्ते बांधणीचे प्रकल्प आले आहेत. मात्र, यापूर्वीच्या प्रक्रियेदरम्यान शेतकऱ्यांना दिलेली आश्वासने पूर्ण झाली नसल्याचा मुद्दा ग्रामस्थांनी उपस्थित केला. त्यामुळे भविष्यातील औद्योगिक क्षेत्र निश्चित करण्यापूर्वी स्थानिक रहिवासी आणि शेतकऱ्यांचा विश्वास संपादन करावा, अशी मागणी करण्यात आली.

दरम्यान, माजी जिल्हा परिषद सदस्य एकनाथ देशेकर यांनी शेतकऱ्यांना योग्य मोबदला मिळावा, अशी मागणी केली. शेतकऱ्यांना 15 लाख रुपये प्रतिगुंठा दर मिळावा, अशी मागणी देशेकर यांनी केली. मात्र, त्यांच्या या मागणीला बैठकीतील उपस्थित शेतकरी तसेच नगरसेवक विजय खानवकर यांनी विरोध केला.
नगरसेवक विजय खानवकर यांनीही या भूसंपादनाला स्पष्ट विरोध दर्शविला. महोदर आणि चिंचवली गावातील शेतकऱ्यांचा विस्तारित एमआयडीसीला विरोध आहे. सरकारने जमिनीचे अधिग्रहण करताना शेतकऱ्यांना विश्वासात घेतलेले नाही, अशी भूमिका खानवकर यांनी मांडली.

ऑक्टोबरनंतर भूसंपादन
दरम्यान, तळोजा विस्तारित एमआयडीसीच्या दुसऱ्या टप्प्यात महोदर, चिंचवली आणि चिंध्रण या तीन गावांतील 173 हेक्टर जमीन संपादित करण्याची प्रक्रिया सुरू आहे. हरकती व सूचनांनंतर मोजणी आणि दर निश्चितीची प्रक्रिया होणार असून, ऑक्टोबरनंतर इच्छुक शेतकऱ्यांच्या संमतीने प्रत्यक्ष भूसंपादन सुरू होण्याची शक्यता आहे.