जलवाहिनी फुटून लाखो पाणी वाया

| पनवेल | वार्ताहर |

मोरबे धरणातून नवी मुंबई महानगरपालिका कार्यक्षेत्रामध्ये पाणीपुरवठा करणारी 2042 मिमी व्यासाची मुख्य जलवाहिनी कळंबोली येथील मार्बल मार्केट परिसरात बुधवारी (दि.12) सकाळी 10 वाजता फुटली. यामुळे लाखो लिटर पाणी वाया गेले आहे. कामोठे येथील स्थानिक रहिवासी मंगेश आढाव यांच्या ही घटना लक्षात आल्यानंतर त्यांनी सिडको जल विभागाला माहिती दिली. त्यानंतर तात्काळ जलवाहिनीची दुरुस्ती सुरू करण्यात आली. दरम्यान, दुरुस्ती कामासाठी भोकरपाडा जलशुद्धीकरण केंद्रातून नवी मुंबई महानगरपालिका क्षेत्रात होणारा पाणीपुरवठा तातडीने बंद करण्यात आला होता. दुरुस्तीचे काम युद्धपातळीवर सुरू करण्यात आल्याने नवी मुंबई महानगरपालिका क्षेत्रात व सिडको क्षेत्रातील खारघर व कामोठे येथे बुधवारी संध्याकाळी पाणी पुरवठा करण्यात आला नाही. तसेच, गुरुवारी (दि.13) सकाळचा पाणी पुरवठा कमी दाबाने होईल. नागरिकांनी पाणी जपून वापरावे व प्रशासनास सहकार्य करावे, असे आवाहन अतिरिक्त शहर अभियंता (स्थापत्य) यांनी केले आहे.