चौल–रेवदंड्यात ‘महिला दिन महोत्सव’

कला, संस्कृती आणि आत्मविश्वासाचा भव्य सोहळा

। अलिबाग । प्रतिनिधी ।

आंतरराष्ट्रीय महिला दिनानिमित्त चौल–रेवदंडा परिसरातील महिला व मुलींसाठी एक भव्य आणि उत्साहवर्धक कार्यक्रम आयोजित करण्यात आला आहे. ‘महिला दिन महोत्सव 2026 – पर्व 2’ हा विशेष कार्यक्रम रविवार दि.8 मार्च रोजी सायंकाळी 6.30 वाजता रेवदंडा येथील एस.आर.टी. हायस्कूल ग्राउंडवर पार पडणार आहे. महिलांच्या कर्तृत्वाचा गौरव, त्यांच्या आत्मविश्वासाला नवी उभारी आणि कला-संस्कृतीचा संगम घडवून आणणारा हा कार्यक्रम परिसरात आकर्षणाचा केंद्रबिंदू ठरणार आहे.

या महोत्सवातील प्रमुख आकर्षण म्हणजे रायगड जिल्ह्यातील 11 प्रसिद्ध मॉडेल्सचा मराठमोळा फॅशन शो. पारंपरिक मराठी संस्कृतीची झलक दाखवणारा हा फॅशन शो प्रथमच चौल-रेवदंडा परिसरात सादर होणार आहे. त्यामुळे नागरिकांमध्ये मोठी उत्सुकता निर्माण झाली आहे. या फॅशन शोचे दिग्दर्शन आंतरराष्ट्रीय कोरिओग्राफर जयेश पाटील करणार असून, मॉडेल्सचा हेअर आणि मेकअपची जबाबदारी युगाज सलोन, रेवदंडा पारनाका यांनी स्वीकारली आहे. तसेच फॅशन शोसाठी आकर्षक दागिन्यांची सजावट कलाधरा ज्वेलरीतर्फे करण्यात येणार आहे.

कार्यक्रमात मनोरंजनाची रंगत वाढवण्यासाठी झी युवा फेम प्रतिम सुतार यांचा लोकप्रिय ‘होम मिनिस्टर’ हा खेळकर आणि मनोरंजक उपक्रम आयोजित करण्यात आला आहे. या स्पर्धेत सहभागी होणाऱ्या महिलांना पैठणी जिंकण्याची सुवर्णसंधी मिळणार असल्याने महिलांमध्ये विशेष उत्साह दिसून येत आहे. याशिवाय, कार्यक्रमासाठी उपस्थित राहणाऱ्या प्रत्येक महिलेला एक आकर्षक भेटवस्तू देण्यात येणार असल्याची माहिती आयोजकांकडून देण्यात आली आहे. त्यामुळे या कार्यक्रमात महिलांची मोठ्या संख्येने उपस्थिती अपेक्षित आहे. हा भव्य महिला दिन महोत्सव पल्लवी अमित म्हात्रे यांच्या पुढाकाराने आयोजित करण्यात येत असून, कार्यक्रमाचे मॅनेजमेंट हेड अमित रघुनाथ म्हात्रे आहेत. महिलांच्या सन्मानासाठी आणि त्यांच्या सहभागातून सामाजिक ऐक्य वृद्धिंगत करण्याच्या उद्देशाने हा उपक्रम आयोजित करण्यात आला असल्याचे आयोजकांनी सांगितले.

चौल-रेवदंडा परिसरातील सर्व महिला आणि मुलींनी या कार्यक्रमाला आवर्जून उपस्थित राहून महिला दिनाचा उत्सव उत्साहात साजरा करावा, असे आवाहन आयोजकांनी केले आहे.